Gürcüstanda XI çağırış parlamentin ilk iclası oktyabrın 25-də keçiriləcək. Gürcüstan qanunvericiliyinə görə, yeni seçilmiş parlamentin ilk iclasını prezident çağırır və açır, baxmayaraq ki, bu dəfə Gürcüstanın yaxın tarixində ilk dəfədir ki, prezident iclas təyin etmir.
Parlamentin reqlamentinə görə, birinci iclasda prezident iştirak etmədiyi halda iclası parlamentin yüksək vəzifəli üzvü açır.

Onews.az xəbər verir ki, parlamentin sədri seçilənə qədər sessiyaya "Gürcü arzusu"nun nümayəndəsi Lado Kaxadze rəhbərlik edəcək.

Parlamentin ilk iclasında yeni seçilmiş parlamentin əksəriyyəti - 76 deputat iştirak etdikdə işə başlamaq səlahiyyəti verilir. İlkin olaraq parlament aparatı MSK-nın verdiyi müvəqqəti vəsiqələr əsasında parlamentin deputatlarının qeydiyyatını həyata keçirəcək, deputatlar qeydiyyat vərəqəsini imzalamaqla onların iclasda iştirakını təsdiq edəcək.

Parlamentin ilk iclasında iki müvəqqəti komissiya - səslərin hesablanması komissiyası və mandat komissiyası yaradılacaq.
Parlamentin müvəqqəti mandat komissiyasına gəlincə, o, 17 nəfərdən ibarətdir və prosedur məsələlər və qaydalar komitəsi təyin olunan kimi onun səlahiyyətlərinə xitam veriləcək.

Parlament bu səlahiyyəti parlament üzvlərinin tam tərkibinin üçdə ikisinin səlahiyyətini tanıdığı andan əldə edəcək. Bu andan əvvəlki çağırış parlamentin səlahiyyətləri dayandırılacaq.

Yeni seçilmiş parlament birinci iclasda aşağıdakı ardıcıllıqla məsələlərə baxacaq: - Parlamentin sədrini, sədr müavinlərini və komitə sədrlərini seçəcək. Parlamentin ilk iclası qeyd olunan məsələlər bitənə qədər davam edəcək.

MSK-nın rəsmi nəticələrinə görə, XI çağırış Milli Məclisə beş siyasi partiya daxil olub. “Gürcü arzusu” partiyası 89 deputatla, “Dəyişikliklər Koalisiyası” 19, “Birlik – Milli Hərəkat” 16, “Güclü Gürcüstan” 14, “Gürcüstan Naminə Qaxaria” partiyası isə 12 mandata layiq görülüb.

“Gürcü arzusu”ndan başqa baryeri keçən partiyaların heç biri MSK-nın açıqladığı nəticələri tanımır və parlamentə daxil olmayacaqlarını elan ediblər.

Elgiz M.