O təkcə 1999-cu ilin deyil, həm də Cənubi Qafqazda 90-cı illərin ən güclü zəlzələsi sayılırdı.

Onews.az xəbər verir ki, söhbət 1999-cu ilin 4 iyununda baş verən Ağdaş zəlzələsindən gedir.

Yeraltı təkanlar o qədər güclü olmuşdu ki, dövrün mətbuatı “Zəlzələ Ağdaşı dağıtdı”, “Ağdaşda daş üstə daş qalmadı” başlıqlarından istifadə etmişdi.

İyunun 4-də saat 14:12-də baş verən zəlzələ əslində bütün ölkə ərazisində hiss olunmuşdu.

Hətta Gürcüstanın və İranın seysmoloqları da zəlzələ siqnalı almışdılar.

Dövlət Seysmik Mərkəzinin rəsmi məlumatında deyilirdi ki, onun gücü 6,5-7 bal gücündədir.

Bir qədər sonra yerli informasiya agentlikləri yeraltı təkanların 7-12 bal gücündə olduğunu yazmağa başlayırlar.

Zəlzələnin episentri isə Ağdaş və Ucar rayonlarını əhatə edir.

Rayon icra hakimiyyətləri Ağdaş və Ucarda vəziyyətin olduqca gərgin olduğunu söyləyirlər.

Hər iki rayonda köhnə binaların hamısı uçub dağılır.

15 nəfər sakin ağır yaralanır.

İki şagird məşğələ zamanı köhnə məktəb binalarının birində uçqun altında qalır.

Sonradan verilən rəsmi məlumatlarda 50 nəfər insanın ağır yaralı halda rayon xəstəxanalarına çatdırıldığı vurğulanır.

Səhiyyə Nazirliyi isə Ağdaş və Ucara 5 həkim briqadası göndərir.
Zəlzələdən 1 gün sonra Göyçayda 8 nəfərin ağır yaralandığı vurğulanır.

Ən çox yaralıların Ağdaşın Ləki qəsəbəsində olduğu qeyd olunurdu.

Rəsmi məlumatlarda zəlzələ nəticəsində yalnız 1 nəfərin öldüyü bildirilir.

Tural Turan
Onews.az