Gənc yazar Emil Rasimoğlu yazıçı Şərif Ağayarın ədəbiyyatla bağlı düşüncələrini tənqid edib.

Onews.az xəbər verir ki, Emil Rasimoğlu Məmməd İsmayılın yubileyində Şərif Ağayarın səsləndirdiyi fikirlərə münasibət bildirib:

“Sanki yubiley, zal (hətta Şərif Ağayarın özü!) Şərif Ağayarı Oqtay Rzanın nitqinə transfer edir. Yəni, bu adam həmin an bir o qədər pafosa çevrilir... çevrilə bilir... çevrilə bilib.

Məsələnin məğzinə keçməzdən öncə onu da deyim ki, o pafos Oqtay Rzada qeyri — ixtiyari olaraq təbii prosesin, eyni zamanda kütləvi təfəkkürün nəticəsi kimi meydana çıxırdısa da, bu hal Şərif Ağayarda ədəbi təfəkkürə xəyanətin, ədəbi prinsiplərə dönüklüyün nəticəsi kimi meydana çıxır...

Belə ki, Oqtay Rza nitqli Şərif Ağayar bir az da Rafael Hüseynov surəti alıb ədəbiyyatdan kortəbii şəkildə söz açır və qayıdır ki,

"İnsan böyük şəxsiyyət olur. Və bundan sonra onun yazdıqları istəsə də balaca ola bilmir."

Adama deməzlərmi, ay hörmətli Şərif bəy... Şərif müəllim... Şərif qardaş... Şərif AĞayar niyə MƏTN(prinsiplərin)in üzünə AĞ olur? Niyə yalan danışırsan?

Şəxsiyyətin, yaxşı insan olub — olmamağın böyük ədəbiyyat, ciddi sənət yaradıb — yaratmamaqla nə əlaqəsi?

Axı, şəxsiyyət mənəvi hadisədir, SƏNƏT İSƏ ədəbi mexanizm, yaradıcı təfəkkür, fövqəl idrak hadisəsidir... Bunlar ayrı — ayrı müstəvilərdə müzakirə olunası məsələlərdir.

Bir müəllifin insan olaraq şəxsiyyətli olması HƏLƏ onun ciddi mətn yarada bilməsi, ortaya fundamental sənətkarlıq qoya bilməsi anlamına gəlmir... gələ bilməz... gəlməməlidir.

Şəxsiyyətin kriteriyaları, tələbi, təsdiqi bir ayrıdır,... mətnin, yaradıcılığın kriteriyaları, tələbi, təsdiqi bir ayrı!

Aydın olurmu, cənab Şərif Ağayar həzrətləri?”