Nüvə Silahlarının Ləğvi Tədqiqat Mərkəzi nüvə silahlanması hesabatını təzələyib.

Onews.az-ın xəbərinə görə, tədqiqat mərkəzi dünyada nüvə başlıqlarının sayının 280 ədəd azalaraq 13130-a düşdüyünü bildirir.

Bu azalma nüvə silahlarının modernləşdirilməsi çərçivəsində bəzi köhnə başlıqların məhv edilməsi səbəbindən baş verir.

Hesabatda vurğulanır ki, 9 nüvə dövləti aktiv nüvə başlıqlarının sayını artırıb.

Nəticədə orduların nüvə arsenallarında aktiv başlıqlarının sayı 9346-dan 9615-ə yüksəlib.

Bəs ölkələrin nüvə silahı üzrə reytinqi necədir?

Nüvə arsenalında ilk yer yenə də Rusiyaya məxsusdur.
Kremlin əlində 6260 nüvə başlığı var.

Onu 5550 aktiv nüvə başlığı ilə ABŞ izləyir.
Bu siyahıda 3-cü yeri tutan Çin isə rəqiblərindən xeyli geri qalır.
Çinin cəmi 350 nüvə silahı mövcuddur.

Bu üç ölkəni 290 başlıq ilə Fransa izləyir.
225 başlıq ilə İngiltərə ilk beşliyi tamamlayır.

Dost ölkə Pakistan 165 başlıq ilə altılıqda qərar tutur.
Onun əzəli rəqibi Hindistan isə 160 başlıq ilə yeddincidir.

90 başlıqla İsrail səkkizinci pillədən boylanır.
İsraili 40 başlıqla Şimali Koreya izləyir.

Son bir ildə Çin və İngiltərə 30, Pakistan, Hindistan və Şimali Koreya isə 10 yeni nüvə başlığı istehsal edib.

ABŞ və Rusiyanın ümumi nüvə silahı arsenalının 86%-nə sahib olduğu açıqlanan hesabatda bildirilir:

SİTAT: "ABŞ və Rusiya arasında silah yarışları davam edərkən, Çinin də qoşulduğu üçlü ixtilaf və gərginlik mərkəzi ortaya çıxır"…

Siyahıda İranın nüvə silahının olmadığı göstərilir…

Banu Murad