İspaniya millisinin futbolçusu Lamin Yamal Almaniyada keçirilən Avropa çempionatının xüsusi mükafatına layiq görülüb. O, Avro-2024-ün ən yaxşı gənc oyunçusu seçilib.

Onews.az xəbər verir ki, iki gün öncə 17 yaşı tamam olan Yamal xüsusən yarımfinal matçındaFransanın qapısına uzaqdan vurduğu fantastik qolla yadda qalacaq.

Lamin Yamal İspaniya doğumlu, Afrika mənşəli futbolçudur. O, 2007-ci il iyulun 13-də İspaniyanın Kataloniya əyalətindəki Esplugues de Llobregat şəhərində anadan olub.

Anası Şeyla Ebana İspaniyaya Afrikadakı ən kiçik ölkələrdən biri olan Ekvatorial Qvineyadan gəlib.

Şeyla Ebana əvvəllər ofisiant işləyib.

Futbolçunun atası Mounir Nasraoui də Afrika mənşəlidir, o İspaniyaya Mərakeşdən gəlib.

Lamin Yamal mənşəcə Ekvatorial Qvineya və Mərakeş qarışığıdır.

Futbolçu hələ 3 yaşında ikən valideynləri ayrılıblar, o, anasının himayəsində böyüyüb.

Lamin 4 yaşından futbol oynamağa başlayıb. O, 6 yaşında “Barcelona”nın diqqətini cəlb edib.

2014-cü ildə "Barselona"nın futbol akademiyasında məşqlərə başlayıb və bu nəhəng kluba qoşulub.