"Ötən ilin yekunlarına görə, Azərbaycanda işsiz gənclərin ümumi sayı 154 min 100 nəfərə yaxındır. Bu o deməkdir ki, ölkədə gənclər arasında işsizlik göstəricisi 11.2 faizdir. Yəni hər 9 gəncdən biri işsizdir".

Mövzu ilə bağlı Onews.az-a açıqlama verən İdman Federasiyasının Fəxri Prezidenti və iş adamı Ayxan Baxşəlizadə bildirib ki, gənclərin işə düzəlməsi məsəsələsi olduqca vacib məsələlərdəndir.

İş adamı qeyd edib:

“Həqiqətən, bəzən Azərbaycan gəncinə mənim yazığım gəlir. Çox çətin bir vəziyyətdir. Baxırsan gəncin simasına 20 yaşlarındadır, amma saçları ağarıb, işsizlik, və zamanın boşa keçməsi, özünə iş yeri tapa bilməyib. Nə qədər cavan gənclərimiz işsizlikdən əziyyət çəkir. Onların işlə təmin olunması məsləsi dövlətin prioritet sahələrindən biridir. Təəssüf ki, bu günə qədər gənclər siyasəti ilə bağlı çox danışılıb, ancaq bu siyasət yerində sayır. Gənclər siyasəti doğru-düzgün yerinə yetirilsəydi, bu gün Azərbaycan gəncləri çətin vəziyyətdə yaşamaz, işsiz olmazdı”.

A.Baxşalızadənin fikrincə, gəncləri dörd divar arasına toplayır, mühazirə oxuyurlar, bığlı-saqqalı kişilər danışır, cavanlar da toplantıda yuxuya gedirlər:

"4 ilin sonunda isə bəzi universitetlərdə açıq bazar kimi diplomu pul ilə satmağa başlayırlar. Burada bir sual yaranır: Pul ilə satılmış kağız parçasının hər hansısa biliyə yiyələnmədikdən sonra nə önəmi var? Yoxsa evdə balış altında yatızdırmağa satırlar bu diplomu? Hərənin əlinə bir dəftər-qələm vermək gənclər siyasəti deyil. Siyasəti gənclərin elmə, biliyə, yaxşı təhsilə, peşəyə yönəldilməsidir. Gənc 20 yaşında arıtq bir iş sahibi olmalı və həyatını heç kimdən asılı olmayacaq bir şəkildə yaşamağa başlamalıdır. Ancaq bu yaşdakı gənc hazırda küçə-küçə gəzib iş axtarır. Yəni biz gəncə istədiklərini verə bilmirik. Hesab edirəm ki, yeni seçilmiş Parlament də gənclərin işşizliyi ilə bağlı məsələ qaldırılaraq qərar qəbul olunacaq. Əks halda bu gedişlə biz gənclərimizi günü-gündən göz görə-görə itirmiş olacağıq".