Gürcüstan Prokurorluğu “Eurojust” təşkilatının dəstəyi ilə yaradılmış beynəlxalq istintaq qrupunun iştirakı ilə Avropa İttifaqı ölkələrinin kitabxanalarından bahalı kitabların oğurlanması ilə bağlı daha bir şəxsi həbs edib.

Onews.az xəbər verir ki, bu barədə Baş Prokurorluq məlumat yayıb.

Məlumata əsasən, iş üzrə aparılan istintaq zamanı müəyyən edilib ki, Gürcüstan vətəndaşları 2022-ci ilin əvvəlindən mütəşəkkil cinayətkar qrup yaradaraq, sonradan bütün Avropada satış üçün 19-cu əsrin müxtəlif müəlliflərinin bahalı kitablarını gizli yolla əldə etmək niyyətində olublar.

Bunun üçün mütəşəkkil dəstənin üzvləri saxta şəxsiyyət vəsiqələrindən, qondarma adlardan və əvvəlcədən hazırlanmış saxta kitab nümunələrindən istifadə edərək əslini dəyişdiriblər.

Cinayət planına əsasən, mütəşəkkil dəstənin üzvləri Fransa, Almaniya, Latviya, Litva, Estoniya, İsveçrə, Polşa və Çexiyanın milli və universitet kitabxanalarından XIX əsr klassik yazıçıların kitablarını oxumaq adı ilə götürüb, orijinal kitabların yüksək keyfiyyətli nüsxələri ilə əvəz ediblər.

Bu yolla 2022-2023-cü illərdə mütəşəkkil dəstə üzvləri Avropanın müxtəlif şəhərlərinin kitabxanalarından yüz minlərlə avro dəyərində kitablar ələ keçiriblər.

Faktla bağlı Cinayət Məcəlləsinin 177-ci maddəsinin 4-cü hissəsinin “a” və “b” bəndləri ilə istintaq tədbirləri davam etdirilir, saxlanılan şəxsləri 6 ildən 10 ilədək azadlıqdan məhrumetmə cəzası gözləyir.

Bildirilir ki, sözügedən iş üzrə istintaqı Eurojust-un dəstəyi ilə yaradılmış beynəlxalq istintaq qrupu aparır. Davam edən istintaq çərçivəsində mütəşəkkil cinayətkar dəstənin daha 4 üzvünə qarşı artıq cinayət işi başlanıb.
Türkay