12 sentyabr türk dünyasının böyük söz adamı, ümumtürk sözünün çağdaş və təkbaşına ehkamı Rüstəm Behrudinin doğum günüdür. İkinci qərinəni yola salıb, üçüncüsünü kürəyinə şələləyib.


Rüstəm Behrudi hazırda türk dünyasının bayraqdar imzasıdır.

Modern Turan şeirinin əbədi maestrosudur!

Sovet dövrünün qılıncının önünün də, arxasının da kəsici olduğu çağlarda o, türkün üstü tozlu huşunun tozunu silirdi.

O, bunu manqurtlaşdırılan 300 milyonluq ulusun söz qılıncını çəkərək, bozqurdları, şaman dualarını arxasına alaraq, 5 min illik türk mifologiyasına qələmini və çiynini söykəyərək edirdi.

Şeirin dilini tanrının üsyan dilinə çevirərək ümumtürk yaddaşını dar ağacına salam verməklə ölümdən, bəlkə də əbədilik məhv olmaqdan qurtardı.

Bu mənada Rüstəm Behrudi hazırda türk dünyasının şəksiz və şəriksiz məhək daşı, sonuncu sütunudur.

Siyasətdə, iqtisadiyyatda türk dünyasında aparıcı rol oynayan Azərbaycanın ədəbiyyat, mədəniyyət sahəsində də bir ədəbi kulta ehtiyac var. Həmin kult elə Rüstəm Behrudidən başqası deyil. O, bu kult mərtəbəsinə hələ ötən yüzilin 70-80-ci illərində yüksəlib.

Bütün türk xalqları ona öz dəyərini layiqincə verib.

O yeni çağ türk şeirinin ən ali dəyər ölçüsüdür. Həm də ümumtürk şeirinin milli kodlarla şifrəli bəşəri şairidir...

O, Qırğızıstanın, Qazaxıstanın, Özbəkistanın, Türkmənistanın, Türkiyənin, ümumilikdə Turanın sabaha uzanan işıq yaddaşıdır.

Bütün şeirləri zamandan və məkandan üstün olan şairə bundan sonrakı yaradıcılıq salnaməsində söz Tanrısı kürsüsündə qalmağı diləyirəm.

Ona Tanrı dağlarında şaman dualarının yeni notlarını yazmağı arzulayıram!

Tural Turan
Prezident təqaüdçüsü
Şair-publisist

Onews.az