Ermənistanın siyasi elitası dayanıqlı fikir müvazinətinə sahib deyil. Baş nazir Nikol Paşinyan və onun hazırkı komandası tez-tez büdrəyən açıqlamalar verməklə gündəmə gəliblər.

Ən pis halda isə İrəvandan gələn açəqlamaların biri o birini təsdiq yox, inkar edib.

Sevindirici haldır ki, Ermənistan tərəfi son bir ayda yekdil fikir ortaya qoyan bəyanatlar vermək üçün özlərində cürət və cəsarət tapırlar.

Görünən odur ki, 8 avqustda Vaşinqtonda imzalanan saziş Ermənistana başqa çıxış yolu qoymayıb.

Düşünürəm ki, işğalçı ölkə təmsilçiləri sülhə xəyanət etsələr, bu ABŞ-a xəyanət sayılacaq.

Ona görə də Viktor Yengibaryan və digərləri Azərbaycanla Ermənistan arasında əldə edilmiş razılığı bəh-bəhlə tərifləyirlər.

Əgər Rusiyadan sərt basqıların təzyiqi bir qədər artarsa, o zaman İrəvanın vəziyyəti də dəyişəcək. Yenə də bəyanatlarda nala-mıxa vurqcaqlar. Hələ ki, Kreml bütün diqqətini Ukrayna cəbhəsinə, orada sülh əldə etməyə yönəldib.

Rusiya sona qədər səssiz qalarsa, o zaman Ermənistanın bəyanatları da stabil olaraq qala bilər.

Sona Əliyeva
V çağırış Milli Məclisin deputatı
Onews.az