Müasir dövrdə ölkələrin iqtisadi inkişafında investisiyaların cəlb edilməsi, biznes mühitinin təkmilləşdirilməsi və beynəlxalq iqtisadi əlaqələrin genişləndirilməsi mühüm əhəmiyyət daşıyır. Bu baxımdan Azərbaycanın həyata keçirdiyi iqtisadi siyasətin əsas istiqamətlərindən biri əlverişli investisiya mühitinin formalaşdırılması və ölkənin iqtisadi potensialının beynəlxalq biznes ictimaiyyətinə təqdim edilməsidir. 25–26 sentyabr 2026-cı ildə Bakıda keçirilən II Azərbaycan Beynəlxalq İnvestisiya Forumu da bu istiqamətdə mühüm platformalardan biri olub. Forum çərçivəsində Prezident İlham Əliyevin iştirakı ilə keçirilən tədbirdə Azərbaycanın iqtisadi inkişaf perspektivləri, investisiya imkanları və regional bağlantılardakı rolu barədə fikir mübadiləsi aparılıb.

Prezident İlham Əliyev çıxışında Azərbaycanın son illərdə əldə etdiyi iqtisadi nəticələrə və gələcək inkişaf üçün yaradılmış imkanlara diqqət çəkib. Bildirilib ki, ölkədə sabit iqtisadiyyatın və müstəqil maliyyə sisteminin formalaşması gələcək inkişafın mühüm əsaslarından biridir. Rəsmi məlumatlara əsasən, son 20 ildə Azərbaycana 350 milyard ABŞ dollarından çox investisiya cəlb olunub və bunun təxminən yarısı birbaşa xarici investisiyaların payına düşüb.

Çıxışda iqtisadiyyatın şaxələndirilməsinin də xüsusi əhəmiyyət daşıdığı vurğulanıb. Azərbaycanın enerji sektorunda əldə etdiyi imkanlarla yanaşı, qeyri-neft sahələrinin inkişafı, yeni istehsal və xidmət istiqamətlərinin formalaşdırılması, yüksək əlavə dəyər yaradan layihələrin həyata keçirilməsi qarşıdakı dövr üçün mühüm istiqamətlər kimi təqdim olunub.
Bərpaolunan enerji sahəsi Azərbaycanın gələcək investisiya imkanları sırasında xüsusi yer tutur. Prezident İlham Əliyev Azərbaycanın Xəzər dənizinin öz sektorunda böyük külək enerjisi potensialına malik olduğunu qeyd edib. Eyni zamanda quruda Günəş və külək elektrik stansiyalarının fəaliyyəti, enerji istehsalında bərpaolunan mənbələrin payının artırılması və mövcud təbii qaz ehtiyatlarından daha səmərəli istifadə məsələləri diqqətə çatdırılıb.

Azərbaycanın investisiya potensialının digər mühüm istiqaməti nəqliyyat və logistika sahəsidir. Son illərdə dəmir yollarının, avtomobil yollarının, dəniz limanlarının və hava nəqliyyatı infrastrukturunun inkişaf etdirilməsi ölkənin regional bağlantı imkanlarını genişləndirib. Prezidentin çıxışında Azərbaycanın qonşu ölkələrlə nəqliyyat əlaqələrinin inkişafına xüsusi önəm verdiyi bildirilib. Bu amillər ölkənin beynəlxalq tranzit marşrutlarında iştirakını genişləndirən əsas şərtlərdən biri kimi təqdim olunub.

Forum çərçivəsində enerji infrastrukturu, elektrik ötürücü xətlər, enerji saxlanc sistemləri və dövlət-özəl tərəfdaşlığı məsələləri də müzakirə olunub. Azərbaycan, Qazaxıstan və Özbəkistan arasında Xəzər dənizinin dibi ilə elektrik kabelinin çəkilməsi, eləcə də Azərbaycanın Gürcüstan və Rumıniya üzərindən Avropa enerji bazarlarına çıxışını nəzərdə tutan Qara dəniz kabel layihəsi bu sahədə regional əməkdaşlığın nümunələri kimi qeyd edilib.

II Azərbaycan Beynəlxalq İnvestisiya Forumu çərçivəsində konkret investisiya layihələri ilə bağlı sənədlərin də mübadiləsi həyata keçirilib. O cümlədən “Abşeron” qaz-kondensat yatağının tammiqyaslı işlənməsi üzrə yekun investisiya qərarı və SOCAR ilə “Comstock Resources” şirkəti arasında strateji tərəfdaşlığa dair çərçivə sazişi ilə bağlı sənədlər mübadilə olunub.

II Azərbaycan Beynəlxalq İnvestisiya Forumu Azərbaycanın iqtisadi və investisiya imkanlarının beynəlxalq biznes dairələri ilə müzakirəsi baxımından mühüm platforma kimi çıxış edib. Forum çərçivəsində səsləndirilən fikirlər göstərir ki, qarşıdakı dövrdə enerji ilə yanaşı, bərpaolunan enerji, logistika, nəqliyyat, rəqəmsal infrastruktur, kənd təsərrüfatı və digər qeyri-neft sahələrində investisiya imkanlarının genişləndirilməsi nəzərdə tutulur.

Bu baxımdan investisiya mühitinin davamlı şəkildə təkmilləşdirilməsi, beynəlxalq tərəfdaşlarla əməkdaşlığın genişləndirilməsi və yeni layihələrin həyata keçirilməsi Azərbaycanın uzunmüddətli sosial-iqtisadi inkişaf gündəliyinin mühüm istiqamətlərindən biri olaraq qalır.

Nigar Abbaszadə,
YAP Nərimanov rayon təşkilatının mühasibi