"İndiki məqamda Tehranı sürətli şəkildə Moskva ilə yaxınlaşdıran yeganə amil Birləşmiş Ştatların İrana mümkün hücum ssenarisidir. Artıq Tramp administrasiyası açıq şəkildə bu hücumla bağlı planın masada olduğunu dilə gətirib. Qəzza zolağında və Suriyada yenilgiyə uğrayan İran diplomatiyası Rusiya ilə yaxınlaşmaqla özünün yeni təhlükəsizlik strategiyasını formalaşdırmağa çalışır".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, hazırda cənub qonşumuzla şimal qonşumuzu birləşdirən əsas "yaşıl xətt" Qərb düşmənçiliyidir:

"İranla Rusiyanın strateji yaxınlığı regionda gərginliyi yenə də artıracaq. Azərbaycan yenə də "iki od arasından" minumum ziyanla çıxmağa çalışacaq. Biz son 20 ildə dəfələrlə düşünülmüş manevrlərlə özümüzü sığortalamağı bacarmışıq. Çünki balanslı siyasət aparmağın nəticəsində hər kəs səninlə tərəfdaş olmaq istəyir. İndi Rusiya, İran müttəfiqliyinə Çin və Hindistanın da qoşulması zərurəti yaranır. Görünən odur ki, Çin də yaxın vaxtlarda Rusiya və İranla öz "əhd-peymanını" yeniləyəcək. Pekində anlayırlar ki, Qərbin Rusiya və İrandan sonrakı əsas hədəfi məhz Çindir. Hindistan isə müəyyən müddət gözləmə mövqeyi tutacaq. Ona görə ki, hazırda "ucuz əmək bazarı" kimi Qərbdən olan iri şirkətlər Hindistana investisiya yatırırlar. Bu dörd ölkədən ən ağır imtahanı çox güman ki, İran verəcək. Səbəbi sadədir, qarşıdakı təhlükəyə yetərli qədər hazırlıqlı deyil".

Banu Murad