"Yaxın on il ərzində Qərb dünyası İranı parçalamaq üçün tam gücü ilə hərəkətə keçəcək. Qərb missionerləri bunun üçün İranda əzilən, hüquqları tapdanan xalqların resurs və imkanlarından yararlanmağa çalışacaq".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, Qərb dünyası hazırda İranda yaşayan kürdlərlə bağlı əməlli-başlı iş aparır:

"İran kürdlərinin İraq və Suriyadakı PKK, YPG kamplarında silahlı təlimlərə cəlb olunması ilə bağlı vaxtaşırı fikirlər səsləndirilir. İran isə bu təhlükəni görməzdən gəlir. ABŞ və Qərb dünyasının maliyyə donorluğu ilə ayaqda durmağa çalışan PKK, YPG terrorçularına qarşı hər hansı tədbir görmür. Əksinə, kürdlərdən ibarət radikal, terror qruplaşmalarının Türkiyəyə qarşı fəaliyyətlərinə münbit şərait yaratmağa çalışır. Qərb İrandakı gilək, talış, bəluc kimi etnik qrupları da bu və ya digər yollarla öz qanadları altına almağa səylər göstərir. Görünən odur ki, Qərb yaxın on il ərzində cənub qonşumuzu içəridən parçalayacaq. Hələ ki, bunun üçün üçüncü ölkələrin ərazilərində əsaslı baza formalaşdırılır".

Fuad Süleyman