"Hesab etmirəm ki, İranda keçiriləcək prezidentliyə namizədlər arasında Azərbaycanla münasibətləri kəskinləşdirməyə çağırış edənlər olsun. Azərbaycan İranın xüsusi münasibətdə olduğu bir ölkədir. Baxmayaraq ki, vaxtaşırı ölkələrimiz arasında anlaşılmazlıq baş verir, baxmayaraq ki, İranın müəyyən dairələri vaxtaşırı Azərbaycana qarşı siyasi təxribata çağırış edirlər, ancaq bununla belə Tehrandakı siyasi elita yaxşı başa düşür ki, Azərbaycanla münasibətlər ölkələri üçün çox şey deməkdir".

Bunu Onews.az-a açıqlamasında Milli Məclisin deputatı Aydın Mirzəzadə deyib.

Millət vəkili bildirib ki, Azərbaycanla münasibətlər İran üçün dünyaya çıxış anlamına gəlir:

"Bu, bir çox sahələrdə əməkdaşlıq etməkdir. Bu, islami dəyərlər məsələsində Azərbaycanın mövqeyini nəzərdən qaçırmamaq deməkdir. Nəzərə alaq ki, bu gün İran ABŞ və Qərb dünyası ilə çox kəskin qarşıdurmadadır. Onun yaxın qonşuları ilə yaxşı münasibət qurmaqdan başqa bir inkişaf xətti yoxdur. Bu qonşular içərsində Azərbaycan və Türkiyə xüsusi yer tutur. Ermənistanla siyasi münasibətləri yüksək səviyyədə olsa da, Ermənistanın siyasi, iqtisadi, hərbi potensialı faktiki olaraq İrana hər hansı bir məsələdə böyük bir yardımçı ola bilmir. Azərbaycan isə tamamilə fərqli bir mövqedədir. Azərbaycan dünya ilə sıx münasibətdədir. Ölkəmizin iqtisadiyyatı ildən ilə böyüyür. Dövlətimizin hərbi qüdrəti 44 günlük Vətən Müharibəsində, daha sonra birgünlük anti-terror tədbirlərində göründü. Azərbaycanın siyasi nüfuzu böyükdür. Azərbaycan beynəlxalq tədbirlərə ev sahibliyi edir. Bu ilin noyabrında ölkəmizdə COP-29-un keçirilməsi Azərbaycanın yüksək nüfuzunun göstəricisidir".

Millət vəkili düşünür ki, bu baxımdan, İranın dövlət başçısı postuna iddiaçıları Azərbaycanla yaxşı münasibətlər qurmaqda maraqlıdırlar:

"Dünyasını dəyişən prezident İbrahim Rəisi ilə bir çox məsələlərdə razılığa gəlinmişdi. Bunların içərisində energetika və logistika məsələsi xüsusi önəmə sahibdir. Şübhəsiz ki, bu İran büdcəsi üçün böyük gəlirlər deməkdir. Bu, yüzminlərlə yeni iş yerlərinin yaradılmasıdır. Bu, uzun müddətli perspektivdir. Ona görə də düşünürəm ki, yeni seçilən şəxs mərhum prezident İbrahim Rəisi ilə danışıqlarda dayanılan nöqtədən o tərəfə münasibətlərin inkişaf etdirilməsində maraqlı olacaq. Hər halda, cəmi 2 aydan sonra yeni liderin adı bilinəcək. Onun xarici siyasətində Azərbaycanla münasibətlərin yaxşı olması barəsində hər hansı şübhəm yoxdur. Yəni biz İranın yeni liderindən Azərbaycanla bağlı pozitiv notlar eşidəcəyik".

Turan