Emil Rasimoğlunu on ilə yaxındır ki, tanıyıram.

Ədəbi vicdanına, şəxsi keyfiyyətlərinə bələdəm.
Onun qələmə aldığı bütün tənqidi fikirlər sağlam düşüncəsinə, saf vicdanına və əqidəsinə söykənir.

Təəssüf ki, bizim cəmiyyət kifayət qədər azad deyil. Hələ də bütləşmə təsiri altındadır. Məhz buna görə də Emil Rasimoğlu imzası hansısa yazıçı, şair haqqında fikir bildirəndə onun üzərinə sosial şəbəkələrdə hücum çəkirlər.

Emilin ədəbi tənqid yazdığı imzaları bütləşdirənlər bir çox hallarda sağlam düşüncəyə söykənmədən, əks arqument qoymaq bacarıqları, bilikləri yetmədiyindən şər-böhtana, nalayiq ifadələrə yer verirlər.

Əslində Sabir Rüstəmxanlıların, Məmməd İsmayılların təhqirbaz "müdafiəçiləri" seçdikləri bu "üsulla" müdafiə etdikləri şəxslərin ədəbi keyfiyyətlərinə, imza nüfuzlarına kölgə salırlar.

Modern boz ədəbiyyatın ən ağrılı nüanslarından birincisi bəlkə də bu faktordur.

Emil Rasimoğlu sənətkardır, peşəkar müşahidə və baxış ustasıdır. Peşəkarları və sənətin nə olduğunu anlayanları isə söyüşlə, təhqir və iftiralarla yollarından döndərmək mümkün deyil.

İndi bildinizmi ki, kimdir Emil Rasimoğlu və sizinlə onun arasında hansı uçurum dayanır?!.
Tural Turan
Şair-publisist

Onews.az