"Zəngəzur dəhlizi məsələsində İranla Amerika Birləşmiş Ştatlarının maraqları üst-üstə düşür. Görünən odur ki, Zəngəzur dəhlizi təkcə İranın yox, həm də onun ən böyük düşməni ABŞ-ın da "qırmızı xətti" sayılır. Ona görə də, Türk quru yoluna hakimiyyəti bütün güclər öz nəzarətində saxlamaq istəyir".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, Birləşmiş Ştatların Zəngəzur dəhlizini 100 illik icarəyə götürmək və bu dəhlizin təhlükəsizliyini təmin etməklə bağlı hansısa bir səfirin dilindən səsləndirməsi Vaşinqtonun Güney Qafqazla bağlı gələcək planlarının tərkib hissəsidir:

"Zəngəzur dəhlizi türk dünyasını birləşdirən əsas quru yoldur. Bu yolun türklərin nəzarətinə keçməsini istəmirlər. Məhz buna görə də Zəngəzur dəhlizi məsələsində Britaniya, Rusiya ilə yanaşı, ABŞ və İranın maraqları üst-üstə düşür. ABŞ Ermənistandakı səfirinin ağzı ilə bu fikri səsləndirməklə İrəvan və Bakının nəbzini yoxlamağa çalışır. Ardınca ABŞ prezidenti deyir ki, tezliklə Azərbaycanla Ermənistan arasındakı məsələ uğurla həllini tapacaq. Bu, indiki məqamda həm də Rusiyanın damarına basmaqdır. Vaşinqton Kremlə bununla demək istəyir ki, Güney Qafqazda artıq sənin yerin yoxdur. İrəvan isə hələ ki, iki ağac arasındakı ip üzərində yeriməyə çalışır. Amma hər kəsin əlində bir qayçı var, İrəvanın buraxacağı səhvi gözləyir. Bu mərhələdə İranın mövqeyi maraqlı olacaq. ABŞ və Rusiya arasında seçim edilməlidir. Mollalar indi bu barədə baş sındırırlar. Düşünürəm ki, Zəngəzur dəhlizi məsələsində Bakı və Ankaranın diqtələri həlledici olacaq. Zəngəzur dəhlizi tezliklə Türk dünyasına xidmət göstərən dəhlizə çevriləcək".

Banu Murad