"Düşünürəm ki, yeni dünya düzəninin formalaşdığı bir vaxtda Türk Dövlətləri Birliyi vahid iqtisadi sistemə və ortaq valyutaya keçməlidir. Bu, türk xalqları arasında çoxvektorlu inteqrasiyanı daha da sürətləndirəcək".

Bunu Onews.az-a açıqlamasında V çağırış Milli Məclisin deputatı, siyasi şərhçi Sona Əliyeva deyib.

Keçmiş millət vəkili bildirib ki, yeni onilliyin çağırışları türk dövlətləri arasında sürətli iqtisadi inteqrasiya məsələsini daha da aktuallaşdırır:

"Ortaq valyuta digər iqtisadi güc mərkəzləri ilə əməkdaşlıqda qardaş ölkələrin dollar, avro, yuan kimi valyutalardan asılılığını azaldacaq. Eyni zamanda, 7 türk dövlətinin iqtisadiyyatını daha sağlam, təhdidlərə daha dözümlü olmağa sövq edəcək. Avropa Birliyi, Gömrük İttifaqı formatlarında bir iqtisadi təşkilatın yaradılması mümkündür. Ən əsas amillərdən biri də Türk Dövlətləri Təşkilatı bayrağı altında birləşən ölkələr Avropa ilə Asiya arasında ən yazşı və alternativsiz körpü olacaq. Böyük İpək yolu qovşağını yenidən canlandırmaq və böyük iqtisadi haba, qovşağa nəzarət etmək şansı hələ də öz əlimizdədir. Düşünürəm ki, bu istiqamətdə iş gedir və prosesi daha da sürətləndirmək vacibdir".

Fuad Süleyman