Onews.az Tural Turanın "Qızıl Alma marşı"nı təqdim edir:

Qızıl Alma marşı

Salam, doğma Bakı, ey ulu körpü!
Yenə də dan yeri alnından öpür!
Gedirəm Turana bir küp su gətir,
Yolum Qızıl Alma, uğurlar dilə!

Salam ulu Daşkənd, Teymur nəfəslim!
Turanın taleyi alnından əsir...
Səmərqənd, Buxara diriliş səsi...
Yolum Qızıl Alma, uğurlar dilə!

Salam, Aşqabadım, Marım, Lebapım!
Daha ayrılığa qalmayıb tabım!
Sizə qovuşmasam, artar əzabım,
Yolum Qızıl Alma, uğurlar dilə!

Salam, qoca Bişkek, salam Oş eli!
Gəlir hüzuruna sevdadan dəli!
Qonub çiynimizə Tanrının əli,
Yolum Qızıl Alma, uğurlar dilə!

Salam, Ankaranın ey daş yaddaşı!
Yenə hücum çəkir üstümə naşı!
Başımda bir dəli tufan dolaşır,
Yolum Qızıl Alma, uğurlar dilə!

Salam, Bayqonur, salam, Astana!
Bürü bu dünyanı göy-sarı dona!
Kim vergül atar ki, Türk yazan sona!?!
Yolum Qızıl Alma, uğurlar dilə!

Salam Lefkoşaya, Girnəyə salam!
Batıya, doğuya, güneyə salam!
Hər türk çadırına, hər öyə salam,
Yolum Qızıl Alma, uğurlar dilə!

Salam, Tanrı dağı! Qarşıla bizi!
Qırılıb düşmənin kürəyi, dizi!
Yenə dan yerinin ağarıb üzü,
Yolum Qızıl Alma, uğurlar dilə!

Tural Turan