Bu gün 2020-ci ilin 44 günlük Vətən savaşının başlamasından 4 il ötür. Hər il 27 sentyabr tarixi ölkəmizdə müqəddəs şəhidlərimizin Anım Günü kimi qeyd olunur.

Onews.az Prezident təqaüdçüsü, şair Tural Turanın şəhidlərimizə və 44 günlük savaşdakı qələbəmizin başlanmasına həsr etdiyi "27 sentyabr - montajsız rekviyem" şeirini təqdim edir

***
27 sentyabr
(montajsız rekviyem)

Dan yeri yamşağı üzdən açmamış
şimşəklər Tanrıya yağdırır alqış!
Açır sinəsini buludlar yenə,
torpaq göz yaşını geyir əyninə;
Hava narahatdı tutqunluğundan...
Divarı analar, körpələr olan
ev narahatdı, yuva narahatdı.

...Tanrı məktub yazır hər bir səngərə
qaşları düyünlü yorğun havadan.
Yazır ki, buludda ilişib qalan,
zirehi deşməyən dua narahatdı...

Danyeri qorxuyla boylanır Yerə!
Günəş də qorxuyla açır gözünü.
Gündüzün köksünə sanki qan damıb...
Özün öz ovcunda can verə-verə,
ölən duaların qaldır üzünü,
sən ey ibadətin yorğun adamı!..

...Payızın rəngindən qorxan durnalar
Yüksəlir havaya tələm-tələsik...
Göy üzündən yerə baxan durnalar,
Bütün səngərlərə deyir: - hələlik...

Baxıram saata, altıya qalır,
Hansısa mərminin qaçır yuxusu .
Hansısa silahda oyaqdı güllə,
Hansısa qəlpənin qaçır qorxusu...
çəkir son nəfəsi, çəkir içinə;
açılan sabaha o gülə-gülə...

Açıldı ilk güllə, açıldı, Tanrı!
“Ardımca!”, qışqırdı səbrin kasası...
Döyüş meydanında durub üz-üzə
Dualar duadan alır qisası...
İlk güllə səsində dünya büküldü,
Bütün müqəddəslər kiçildi, Tanrı!

...Cəbhədən ilk xəbər yazır durnalar,
Manşeti atırlar göyün üzünə:
-Hər mərmi bir evin divarın sökür,
Güllələr gilizlə hörür zəfəri!

Sonra?
Sonra da analar döyür dizinə,
Danışır güllələr, susur durnalar;
Atılır döyüşə sülhün kəhəri!

Tural Turan