Onews.az bu dəfə şair, Prezident təqaüdçüsü Tural Turanın şeirlərini təqdim edir:

***

31 mart tablosu

Axı, mən kiməm, ilahi,
Üzüm məni tanımadı.
Alnımda bitdi günahım,
Yazım məni tanımadı.

Mən ki, açıq-aydın səsdim;
Özüm dindim, özüm susdum...
Neçə yol önümü kəsdi,
izim məni tanımadı.

Yolum açıq, önüm düyün;
Başdaşıyam yerin, göyün.
...Dodağımda böyütdüyüm,
sözüm məni tanımadı.

31 mart 2023, Bakı


***

16 noyabr tablosu

Ay ömrümün asılqanı,
qibləsi yox asi anın!..
Kölgəsindən asılanım,
ilk sevgi də qocalarmış?!

Ömrü unutdum üzündə!
Arzu tutmuşdum gözündə.
Ovunurdum göz önündə,
ilk sevgi də qocalarmış?!

Təqvimlərin sağ tərəfi,
fəsillərin ağ tərəfi...
Tanrının qonaq tərəfi –
ilk sevgi də qocalarmış?!

16 noyabr 2023, Bakı

***

Bir Allahdı, bir də...


Üzümü sökmüşəm saat dişindən
bir Allahdı, bir duadı, bir də mən.
Qopdum bir küçənin qan yaddaşından,
bir Allahdı, bir duadı, bir də mən.

Saçına gül düzən yola vuruldum,
bir itkin gülüşdə külə vuruldum.
Səhrada soyunan selə vuruldum,
bir Allahdı, bir duadı, bir də mən.

Oxşadım telini aylı gecənin.
Yudum ayağını əlil küçənin.
Yazdım göy üzünə olub keçəni,
bir Allahdı, bir duadı, bir də mən...

Dən atdım önünə körpə yuxumun,
ovcuma sığçadı boyu-buxunu.
Fotolar geyindi köhnə qoxumu,
bir Allahdı, bir duadı, bir də mən.

Ağlayır həyətdə solğun qar payım.
Aynada can verir otuz dörd sayı...
Üşüyür otaqda tənha çarpayı,
bir Allahdı, bir duadı, bir də mən.

30 sentyabr 2023, Bakı



***

Bağışla

...Qanadı qırılmış suya,
ölüb-dirilmiş suya,
eşiyə hörülmüş suya bağışla...

Göy üzündən düşən sözə,
o boyda düşən sözə,
o heydən düşən sözə bağışla!

Gəl, bu qorsuz gecəyə,
bu yuxusuz gecəyə,
bu qorxusuz gecəyə bağışla!

...Yoldan ötən tabloya,
çıxıb gedən tabloya,
gözdən itən tabloya bağışla!

Bu axsayan payıza –
nəfəs yuyan payıza,
mənə oxşayan payıza bağışla,
bağışla bu Vətəni!

20 sentyabr 2023, Bakı

***

Səs tablosu

Bir qatar səsinə qoşulub qaçır,
qaçır göy üzünün boz ağrıları.
Sonuncu vaqona doluşub qaçır,
kişi taleyinin qız ağrıları...

Qaçır ümidlərin sonuncu rəngi,
qaçır payızın da körpə baxışı.
Bütün gülüşlərin yanağı gərgin,
bütün yanaqlarda bulud naxışı.

Qaçdılar... boynunda bir ölüm ipi,
vurulub qaçdılar səsin rənginə...
Görsəz, salam deyin kilsə zənginə,
azan səsinin də üzündən öpün...

2022