Ermənistan Respublikasının xarici işlər naziri Ararat Mirzoyan Ermənistan–Azərbaycan münasibətlərinə və blokadanın aradan qaldırılması ilə bağlı davam edən danışıqlara toxunub.

Onews.az-ın məlumatına görə, Milli Məclisdə hökumət üzvləri ilə sual-cavab sessiyası zamanı Mirzoyan Vaşinqtonda imzalanmış deklarasiyanı və sülh müqaviləsinin paraflanmasını xüsusi olaraq vurğulayaraq, bunları olduqca mühüm hadisələr adlandırıb.

Mirzoyan qeyd edib ki, sülhün bərqərar olması uzunmüddətli bir prosesdir və bu, diqqət, ehtiyatlılıq və ardıcıllıq tələb edir.
“Bu gün biz Azərbaycanla blokadanın aradan qaldırılması üzərində işləyirik, sərhədin delimitasiyası prosesində isə yeni xəbərlər ola bilər”, – deyə Mirzoyan bildirib. O əlavə edib ki, ABŞ tərəfdaşları ilə, xüsusilə də birgə dəmiryolu və digər infrastruktur layihələri üzrə müzakirələr davam edir.

XİN rəhbəri vurğulayıb ki, humanitar məsələlərin həlli prioritet olaraq qalır: əsirlərin və girovların azad edilməsi, həmçinin itkin düşənlərin taleyinin aydınlaşdırılması. Onun sözlərinə görə, sülh müqaviləsi imzalandıqdan sonra da müəyyən problemlər qalacaq, lakin hazırda eskalasiya və isti münaqişə riskləri minimuma endirilib.

Banu