Qana ya da rəsmi olaraq Qana Respublikası, Afrika qitəsinin qərbində yerləşən bir ölkədir.

Ölkənin qonşuları Fildişi Sahili, Burkina Faso və Toqodur.

Onews.az xəbər verir ki, dövlətin cənub sərhədlərində Qvineya körfəzi “lövbər salır”…
Uzun illər Britaniya müstəmləkəsi olaraq yaşayan Qana, Afrikada müstəqilliyini qazanan ilk ölkə olması ilə də tanınır.
Qana Afrikanın ən dinc dövlətlərindən biridir.

2023 Qlobal Sülh İndeksinə görə, Qana Afrikanın dördüncü, dünyanın isə 39-cu ən dinc ölkəsidir.
Bir çox digər Afrika ölkələri vətəndaş müharibələrində xeyli “qan itirib”.
Amma Qana bu mənada sabitliyi qoruyub saxlaya bilib.

Turist axını və qəbulu baxımından da Qana Afrikanın ən təhlükəsiz ölkələrindən biridir.
Ölkə coğrafi olaraq sahil xətti bölgəsi, ekvatorial meşələr bölgəsi və savanna bölgəsi olaraq üç hissəyə bölünür.
Qana səth quruluşuna görə isə beş təbii əraziyə ayrılır.

Ölkə faaunasını alçaq düzənliklər, Aşanti dağlıq əraziləri, Akvapim-Toqo silsilələri, Volta hövzəsi və yüksək düzənliklər əhatə edir.
Ölkənin cənub hissəsində ölkənin yüksək nöqtələri, paytaxt Akkradan Toqoya qədər uzanan Akwapim-Toqo dağ silsilələri yerləşir.
Dağ təpələrində və yamaclarda sıx rütubətli meşələr müşahidə olunur.
Müstəqillik meydanı (“Black Star Square”) Qananın paytaxtı - Akkra sərhədlərində yerləşir.

Şəhərin ən sıx və canlı nöqtəsi olaraq da bilinən Müstəqillik meydanı ölkədəki yerli həyatı müşahidə edə biləcəyiniz vacib nöqtələrdən biridir.
Gün ərzində bu meydanın ətrafında bir saat vaxt keçirə bilərsiniz.
Qanada görə biləcəyiniz ən möhtəşəm tikililərdən biri də Osu qəsridir.
Osu qəsri danimarkalılar tərəfindən 1600-cü illərdə inşa edilib.
Onun ikinci adı “Christiansborg Castle”dir.

Bu tarixi qala, illər keçdikcə dəfələrlə yıxılmış və yenidən qurulub.
Tarixi binanı ziyarət etməklə özünüzü qəsrdə deyil, nəhəng bir villanın bağçasındakı kimi hiss edə bilərsiniz.
Qana Milli Muzeyi Qananın yerli mədəniyyəti və tarixi barədə öyrənmək istəyənlər üçün doğru ünvanlardan biridir.

Qiymətli tarixi əsərlər, heykəllər və gündəlik əşyaları görə biləcəyiniz muzeyi ziyarət etmədən bu ölkəni tərk etməməlisiniz.
Ölkənin qurucusu və ilk prezidenti Kvame Nkrumanın adını daşıyan Kvame Nkruma Parkı eyni adlı mavzoleyə də ev sahibliyi edir.
Don Artur tərəfindən dizayn edilmiş bu mavzoley, Akkra şəhərinin əlamətdar yerlərindəndir.

Koforiduanın 17 km şimal-şərqində yerləşən təbii möcüzə - Boti şəlalələri füsunkar bir görkəmə malikdir.
Akkra şəhərindən təxminən bir saat yarımlıq məsafədə yerləşən bu şəlalələr, fotoqrafiya həvəskarları üçün də bənzərsiz çərçivələr yaradır.
Bir qadını və bir kişini simvolizə etdiyi düşünülən iki şəlalənin axdığı yer, Qananın ən məşhur yerlərindən biridir.

Qanaya getməyin bir başqa səbəbi də Akkraya səyahət etməkdir.
Qananın paytaxtı Akkra, Qananın dünyaya açılan qapısıdır.
Afrikanın ən müasir şəhərlərindən biri olan Akkra, Qananın ticarət, sənaye və mədəniyyət mərkəzidir.
Akkra savanna bölgəsində yerləşir.

Tropik iqlimin üstünlük təşkil etdiyi Akkrada illik orta temperatur 26,8 dərəcədir.
Ən isti ay 28 dərəcə ilə Mart, ən sərin ay isə 24 dərəcə ilə avqust ayıdır.
Qanada həmçinin çox canlı bir gecə həyatı var.
Əksər gecə klublarına giriş pulsuzdur.

Siz burada hip-hop, “R&B” stilində musiqilər dinləyə və rəqs edə bilərsiniz.
Festivallar və şənliklər Qana mədəniyyətinin də ən vacib hissəsidir.
Bir çox etnik qrupun özünəməxsus müxtəlif festivalları var.

Homovo, Odvira, Aboakyer, Dodoleglime, Hogbetsotso, Tedudu, Deza və Sandema bu festivallara misaldır.
Doğum, yetkinlik dövrünə keçid, evlilik və ölüm də müxtəlif rituallarla qeyd olunur.
Hər bayram ayrı bir şənlik kimidir.

Akkranın ən vacib festivalı avqust və sentyabr aylarında təşkil olunan Homovo festivaldır.
Əl işi olan taxta oymalar, rəngli rəsmlər, yerli geyimlər və Afrika kuklaları Qanadan xatirə kimi almaq üçün ən yaxşı hədiyyələrdir.
“Aid to Artisans Ghana”, “Loom və Woodi Boutique” əsas alış-veriş yerlərindəndir.

Mokola açıq bazarı isə həm hər şeyi tapa biləcəyiniz, həm də yerli sakinlərlə foto çəkdirib ünsiyyət qurmaq imkanı əldə edəcəyiniz ideal bir yerdir.

Tural Turan