Sərtac Atlas
YAP Nərimanov rayon təşkilatının məsləhətçisi

15 İyun – Milli Qurtuluş Günü Azərbaycan xalqının müasir tarixində taleyüklü dönüş nöqtəsi kimi xüsusi əhəmiyyət daşıyır. Bu tarix təkcə siyasi hadisə deyil, həm də dövlətçiliyimizin qorunması, milli birliyin bərpası və müstəqil Azərbaycanın gələcək inkişaf yolunun müəyyənləşdirilməsi baxımından mühüm mərhələdir.
XX əsrin sonlarında yenidən müstəqillik qazanan Azərbaycan ciddi daxili və xarici problemlərlə üzləşmişdi. Ermənistanın hərbi təcavüzü nəticəsində torpaqlarımız işğal olunur, ölkə daxilində siyasi böhran dərinləşir, hakimiyyət uğrunda mübarizə isə dövlətçiliyin əsaslarını sarsıdırdı. Müstəqilliyini yenicə bərpa etmiş Azərbaycan parçalanmaq və vətəndaş qarşıdurması təhlükəsi ilə üz-üzə qalmışdı.
Belə mürəkkəb şəraitdə xalqın təkidli tələbi ilə Ulu Öndər Heydər Əliyevin yenidən siyasi hakimiyyətə qayıdışı ölkənin taleyində həlledici rol oynadı. 1993-cü il iyunun 15-də Heydər Əliyevin Azərbaycan Ali Sovetinin sədri seçilməsi dövlətçiliyin xilası istiqamətində atılmış ən mühüm addım oldu. Məhz həmin gündən etibarən ölkədə sabitliyin təmin olunması, dövlət institutlarının möhkəmləndirilməsi və milli həmrəyliyin bərpası prosesi başladı.
Ulu Öndərin uzaqgörən siyasəti nəticəsində qısa müddətdə siyasi böhranın qarşısı alındı, qanunsuz silahlı qruplaşmalar zərərsizləşdirildi, dövlət idarəçiliyində nizam yaradıldı. Azərbaycan beynəlxalq aləmdə etibarlı tərəfdaş kimi tanınmağa başladı, ölkənin inkişaf perspektivləri müəyyənləşdirildi. Sonrakı illərdə həyata keçirilən iqtisadi və siyasi islahatlar, hüquqi dövlət quruculuğu prosesi və beynəlxalq əməkdaşlığın genişləndirilməsi məhz həmin dövrdə qoyulan möhkəm təməllər üzərində formalaşdı.
Milli Qurtuluşun ən mühüm nəticələrindən biri də Azərbaycanın gələcək inkişaf strategiyasının müəyyənləşdirilməsi oldu. 1994-cü ildə imzalanan “Əsrin müqaviləsi” ölkəmizin iqtisadi yüksəlişinin əsasını qoydu, xarici investisiyaların cəlb olunmasına və Azərbaycanın enerji təhlükəsizliyində mühüm aktora çevrilməsinə şərait yaratdı. Dövlətçiliyin möhkəmləndirilməsi ilə yanaşı, milli maraqlara əsaslanan xarici siyasət kursu da formalaşdırıldı.
Bu gün Azərbaycan Prezident İlham Əliyevin rəhbərliyi ilə yeni inkişaf mərhələsini yaşayır. Son illərdə əldə olunan nailiyyətlər, xüsusilə ərazi bütövlüyümüzün və dövlət suverenliyimizin tam bərpası, ölkəmizin regional və beynəlxalq nüfuzunun artması Milli Qurtuluşun yaratdığı siyasi sabitliyin və dövlətçilik ənənələrinin məntiqi nəticəsidir.
Milli Qurtuluş Günü xalqımızın birlik və həmrəylik iradəsinin təcəssümüdür. Bu tarix sübut etdi ki, güclü liderlik, milli həmrəylik və dövlətçilik ideallarına sədaqət ən çətin sınaqlardan belə qalib çıxmağa imkan verir. Azərbaycanın müasir uğurlarının təməlində məhz 15 İyun 1993-cü ildə başlanmış qurtuluş yolu dayanır və bu yol ölkəmizi daha böyük hədəflərə doğru aparmağa davam edir.