Əfsanə Muradova
YAP Nərimanov rayon təşkilatının gənc fəalı

Azərbaycan xalqının milli qürur mənbələrindən biri olan Silahlı Qüvvələrimiz ölkəmizin müstəqilliyinin, suverenliyinin və ərazi bütövlüyünün etibarlı təminatçısıdır. Hər il 26 iyun tarixində qeyd olunan Silahlı Qüvvələr Günü Azərbaycan Ordusunun keçdiyi şərəfli inkişaf yoluna nəzər salmaq, hərbçilərimizin fədakarlığını yüksək qiymətləndirmək və gənc nəsildə vətənpərvərlik hisslərini daha da gücləndirmək baxımından mühüm əhəmiyyət kəsb edir.

Geostrateji mövqeyinə görə, böyük dövlətlərin maraqlarının kəsişdiyi ölkə olan Azərbaycanda Demokratik Respublikanın yarandığı gündən, dövlətçiliyin mühüm atributu sayılan nizami ordu quruculuğu istiqamətində mühüm addımlar atıldı. 1918-ci il mayın 28-də qəbul edilmiş "İstiqlal bəyannaməsi"ndə qeyd edilirdi ki, Azərbaycan özünü xarici müdaxilələrdən müdafiə etmək, daxili düşmən qüvvələrini zərərsizləşdirmək üçün nizami orduya malik olmalı, özünün silahlı qüvvələrini yaratmalıdır.


1918-ci il iyunun 26-da Azərbaycan Xalq Cümhuriyyəti tərəfindən ilk milli hərbi hissələrin yaradılması haqqında qərarın qəbul edilməsi ölkəmizdə nizami ordunun əsasının qoyulması ilə nəticələndi. Bununla da Azərbaycan xalqı öz dövlətçiliyini qorumaq üçün güclü ordu quruculuğuna başladı. Müstəqilliyimizin bərpasından sonra isə Azərbaycan Ordusunun formalaşdırılması və inkişaf etdirilməsi dövlət siyasətinin əsas istiqamətlərindən birinə çevrildi.


Ulu Öndər Heydər Əliyevin hakimiyyətə qayıdışından sonra ordu quruculuğu sahəsində mühüm addımlar atıldı. Onun uzaqgörən siyasəti nəticəsində Silahlı Qüvvələrdə vahid komandanlıq sistemi yaradıldı, hərbi intizam gücləndirildi və peşəkar kadr hazırlığına xüsusi diqqət yetirildi. Ulu Öndər hər zaman vurğulayırdı ki, güclü dövlətin əsas dayaqlarından biri güclü ordudur. Məhz bu siyasət Azərbaycanın müasir və peşəkar ordusunun formalaşmasının əsasını təşkil etdi.

Bu gün Prezident, Silahlı Qüvvələrin Ali Baş Komandanı İlham Əliyev rəhbərliyi ilə Azərbaycan Ordusu öz inkişafının ən yüksək mərhələsini yaşayır. Ordumuz müasir silah və texnika ilə təchiz olunmuş, döyüş qabiliyyəti artırılmış və beynəlxalq səviyyədə nüfuz qazanmışdır. Azərbaycan hərbçilərinin peşəkarlığı, vətənə sədaqəti və yüksək döyüş ruhu ölkəmizin təhlükəsizliyinin etibarlı şəkildə qorunmasını təmin edir.

2020-ci ildə baş vermiş İkinci Qarabağ Müharibəsi zamanı qazanılan tarixi Zəfər Azərbaycan Ordusunun gücünü və xalqımızın sarsılmaz iradəsini bütün dünyaya nümayiş etdirdi. Müzəffər Ali Baş Komandanın rəhbərliyi altında qəhrəman əsgər və zabitlərimiz işğal altında olan torpaqlarımızı azad edərək ölkəmizin ərazi bütövlüyünü bərpa etdilər. Bu Zəfər Azərbaycan tarixinin ən şanlı səhifələrindən biri kimi yaddaşlarda əbədi yaşayacaqdır.

Silahlı Qüvvələr Günü hər bir Azərbaycan vətəndaşı üçün xüsusi əhəmiyyət daşıyır. Çünki güclü ordu yalnız dövlətin təhlükəsizliyinin deyil, həm də xalqın sabit və firavan gələcəyinin təminatıdır. Bu gün biz ordumuzun əldə etdiyi uğurlarla qürur duyur, şəhidlərimizin əziz xatirəsini dərin ehtiramla yad edir və qazilərimizin göstərdiyi qəhrəmanlığı yüksək qiymətləndiririk.

Əminliklə demək olar ki, Azərbaycan Ordusu bundan sonra da dövlətimizin maraqlarını layiqincə qoruyacaq, ölkəmizin qüdrətinin daha da artmasına öz töhfəsini verəcəkdir. 26 İyun – Silahlı Qüvvələr Günü münasibətilə bütün hərbi qulluqçularımızı təbrik edir, onlara möhkəm can sağlığı, şərəfli xidmət və yeni nailiyyətlər arzulayıram. Yaşasın Azərbaycan Ordusu, yaşasın müstəqil Azərbaycan!