Asudə Boyaqçızadə
YAP Nərimanov rayon təşkilatının gənc fəalı

15 İyun sadəcə təqvimdə bir gün deyil, Azərbaycanın parçalanmaqdan, bir dövlət kimi yer üzündən silinmək təhlükəsindən xilas olduğu dönüş nöqtəsidir.
Xalqın təkidli çağırışı ilə Bakıya qayıdan Ulu Öndər Heydər Əliyev 1993-cü il iyunun 15-də Azərbaycan Respublikası Ali Sovetinin sədri seçildi. Bu tarix ölkəmizin xilas və dirçəliş missiyasının başlanğıcı – Milli Qurtuluş Günü oldu.
Heydər Əliyevin Ali Sovetin sədri seçildiyi gün etdiyi tarixi çıxış sadəcə bir təşəkkür nitqi deyil, Azərbaycanın gələcək inkişaf strategiyasının manifesti idi. Bu nitqdə dövlətçiliyimiz üçün taleyüklü olan bir neçə fundamental məqam öz əksini tapmışdı:
Ulu Öndər ölkənin içində olduğu "ağır, mürəkkəb və gərgin vəziyyəti" tam məsuliyyətlə dərk etdiyini və bu ağır yükü çiyinlərinə götürməyə hazır olduğunu bəyan etdi.
Heydər Əliyev müstəqilliyin qorunmasını və möhkəmləndirilməsini özünün ən əsas vəzifəsi elan etdi. O, sübut etdi ki, müstəqilliyi elan etmək kifayət deyil, onu qoruyub saxlamaq daha böyük hünər tələb edirdi.
Nitqdə xüsusi olaraq vurğulanırdı ki, müasir Azərbaycan dövləti 1918-ci ildə qurulmuş Azərbaycan Xalq Cümhuriyyətinin ənənələri üzərində, lakin müasir dünyanın tələblərinə uyğun olaraq inkişaf etməlidir. Bu, dövlətçilikdə varislik prinsipinin ən bariz nümunəsi idi.
Xalqa Vəfada Sədaqət Andı:“Ömrümün bundan sonrakı hissəsini harada olursa-olsun, yalnız və yalnız Azərbaycan Respublikasının müstəqil dövlət kimi inkişaf etməsinə həsr edəcəyəm” sözləri liderin öz xalqı və dövləti qarşısında verdiyi müqəddəs and idi. Heydər Əliyev ömrünün sonuna qədər bu anda sadiq qaldı
Heydər Əliyevin rəhbərliyi ilə qısa müddətdə qazanılan nailiyyətlər:
Ölkədə daxili sabitlik bərpa olundu, qanunsuz silahlı dəstələr ləğv edildi.
Atəşkəsə nail olundu və nizami ordu quruculuğuna başlanıldı. "Əsrin müqaviləsi" imzalanmaqla ölkə iqtisadiyyatının intibahının təməli qoyuldu.
Azərbaycan beynəlxalq aləmdə etibarlı tərəfdaş kimi tanınmağa başladı.
Bu gün fəxrlə qeyd etdiyimiz Qurtuluş Günü, eyni zamanda 2020-ci ildə qazanılan möhtəşəm Qarabağ Zəfərinin və dövlət suverenliyimizin tam bərpasının ideoloji və strateji təməldir. Ulu Öndərin uzaqgörən siyasəti və onun layiqli davamçısı Prezident İlham Əliyevin qətiyyəti sayəsində Azərbaycan bu gün regionun lideri, dünyada söz sahibi olan müstəqil və güclü bir dövlətdir. 15 İyun – milli qürurumuzun, dirçəlişimizin və sarsılmaz müstəqilliyimizin rəmzidir.