2015-2020-ci illərdə Bakı Şəhər Halqası Əməliyyat şirkətinin İdman Əməliyyatları şöbəsinin rəisi işləmiş Çingiz Mehdiyevin cinayət işi üzrə növbəti məhkəmə prosesi keçirilib.

Onews.az xəbər verir ki, bu gün Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə təqsirləndirilən şəxs məhkəmənin suallarını cavablandırıb.

Öncə təqsirləndirilən Ç. Mehdiyev sualları cavablandırmaq istəmədiyini bildirib: "Mən özümü təqsirli hesab eləmirəm. Zərərçəkmiş şəxs təqdim eləsin görək ona dəymiş zərər nədən ibarət olub. Bir də ekspert zərəri necə hesablayıb?

Onun idman oyunları ilə bağlı məlumatı nə qədərdir? Mən hələ ki, susmağa üstünlük verirəm, suallara cavab vermək istəmirəm. Qoy, gəlsin zərərçəkən ilk olaraq ifadə versin".

Dövlət ittihamçısı bildirib ki, iş üzrə zərərçəkmiş şəxsin nümayəndəsi prosesdə iştirak edəcək. Onun da ifadə verməsi qanunla mümkün deyil.

Daha sonra o suallara cavab verməyə razılıq verib.

Suallara cavab zamanı məlum olub ki, "Dayton" şirkəti təqsirləndirilən şəxsin anasına məxsusdur:

"Şirkət 2012-ci ildə yaradılıb. Mən yarışlarda iştirak etmədiyim vaxtdan çox qabaq yaranıb. Anamla başqa xarici bir vətəndaşla ortaq yaradılıb. Anam mənə şirkətlə bağlı etibarnamə verilib. O etibarnamə ilə əsasən şirkətdə tərcümə işlərinə kömək edirdim. "Dayton" şirkətinin işi alış-veriş olub. Şirkət adından müqavilə imzalamamışam. Şirkətin ümumi gəliri 2 milyon dolçardan çox olub. "Dayton" şirkətinin varlığı barədə şirkətin rəhbəri Arif Rəhimova məlumat vermişəm. Daha sonra da satınalınma şöbəsinə şirkətin adın və rekvizitlərini vermişəm".

Daha sonra prokuror təqsirləndirilən şəxsə yarışların keçirilməsi üçün spesifik malların alınmasınd iştirakı barədə sual ünvanlayıb. O, bildirib ki, bu malların bazarı çox kiçikdir:

"Dünyada bu malların alınmasında bazar çox kiçik idi. Buna görə də, az şirkətlər bu işi görə bilərdi. Mənə 2015-ci ilin mart ayında dedilər ki, Formula-1 yarışı keçiriləcək. 2015-ci ilin dekabr ayında mənə dedilər ki, yarış üçün olan spesifik mallar tapılmalıdır. Deytona spesifik malları 2016-ci ilin yanvar ayında sifariş etmişəm. Bu malların sifarişi barədə tapşırığı mənə şirkətin rəhbəri Arif Rəhimov verib"

Daha sonra hakim Leyla Əsgərova-Məmmədova vaxt azlığı səbəbindən məhkəməni növbəti günlərə təyin edib.

Məhkəmənin növbəti iclası iyunun 10-na təyin edildi.