“Şəmkir Qadın Resurs Mərkəzi” İctimai Birliyi, cəmiyyətin aktual sosial problemlərinə diqqət yetirərək, Şəmkir Heydər Əliyev Mərkəzi ilə birlikdə erkən nikahlar və məişət zorakılığı mövzularında davamlı maarifləndirici təlimlər təşkil etdi. Bu təşəbbüs, il ərzində erkən nikahların və qadınlara qarşı zorakılıqların qarşısının alınması məqsədilə həyata keçirildi.

Onews.az xəbər verir ki, “Erkən nigah səbəbləri, mübarizə yolları və qadınlara qarşı edilən zorakılıqların aradan qaldırılması” mövzusunda keçirilən təlimlər, yeniyetmələrin, xüsusən də qızların təhsildən yayınması, erkən nikaha məruz qalmaları və bu sosial problemlərin doğurduğu fəsadların müzakirəsinə həsr olundu. Təlimlərdə, erkən nikahların qarşısını almaq və məişət zorakılığı ilə mübarizə aparmaq üçün effektiv yollar və metodlar təqdim olundu.

Tədbirlər yalnız rayon mərkəzində deyil, həmçinin kənd və qəsəbələrdə də keçirildi. İcma daxilində təşkil olunan müzakirələr, erkən nikahların və məişət zorakılığının fəsadları barədə məlumatlılığı artırmaq və bu problemlərin həllinə yönəlmiş səyləri gücləndirmək məqsədi daşıyırdı.

Bu layihə, Şəmkir Qadın Resurs Mərkəzi və Şəmkir Heydər Əliyev Mərkəzinin cəmiyyətin sosial problemlərinə həssas yanaşmasını və qadınların hüquqlarını qorumaq üçün birgə səylərini bir daha nümayiş etdirir.