Ötən həftə Bakıda səfərdə olan və Avropada Azərbaycana qarşı siyasəti tənqid edən Slovakiya baş naziri Robert Fitsonun güllələnməsi bizim üçün də diqqətçəkən hadisədir. Və təbii olaraq, baş nazirin güllələnməsinin pərdəarxası maraqlıdır.

Fitso Rusiyameylli siyasətçi kimi tanınır, çıxışlarında və siyasətində bunu açıq şəkildə nümayiş etdirir. Ukrayna müharibəsində Qərbi ittiham edən mövqeyə malikdir, o cümlədən, Kiyevə hərbi texnika göndərilməsində iştirak etmək istəmir.

Bu kontekstdə ona qarşı törədilən sui-qəsd diqqəti Qərbə yönəldir və belə görünür ki, Avropa öz daxilində “etiraz səslərini” boğur.

Hərçənd, bir ölkənin baş nazirinin küçədə nümayişkərana formada güllələnməsi Qərbin taktikasına bənzəmir. Qərb siyasətini qəbul etmədiyi iqtidarlara qarşı siyasi-iqtisadi rıçaqlarını işə salır, yaxud “rəngli inqilab” ssenarisindən istifadə edir.

Bu baxımdan, Fitso sui-qəsdi müəmmalıdır.

Polis tərəfindən saxlanılan sui-qədçinin təqaüdçü olması hadisədə daxili etiraz motivinin daha çox olduğuna dair ilkin ehtimalı önə çıxarır.

Asif Nərimanlı
Siyasi şərhçi
Onews.az