Xarici turistlər buranı İtaliya möcüzəsi adlandırırlar.


Onews.az bu dəfə sizi turistlərin “kiçik cənnət” adlandırdığı Pozitanoya aparacaq.

Pozitano İtaliyanın cənubunda, Amalfi sahillərində yerləşir. Bura Kampaniya vilayətinin Saleno əyalətinə məxsus kiçik turist şəhəridir.

Şəhər icması cəmi 4000 nəfərdən ibarətdir. Şəhərin patronu yaxud möminlərinin himayəçisi Müqəddəs Vit sayılır.

Möcüzəvi coğrafiyası, romantik dəniz sahilləri və sürrealist mənzərəsi ilə bu şəhər xəyal qurmağı sevən insanların cənnətidir. Bir təpənin kənarında yerləşən evləri, bütöv rəng palitrası, dik küçələri hər kəsin diqqətini özünə cəlb edir. Boz rəngli qum ilə örtülmüş “Spaggia Grande” çimərliyinin ab havası isə möhtəşəm görünür.

Bölgəyə xas olan limonçello likörü içərək qürub çağını zövqlə izləmək olar. İkinci Dünya müharibəsi dövründən Pozitano Avropanın ən zəkalı insanlarının istirahət yeri sayılır.
Azərbaycanlı mühacir yazıçı Məhəmməd Əsəd bəy də vaxtilə burada yaşayıb-yaradıb.



1938-ci ildə almanlar Avstriyanı işgal etdikdən sonra Məhəmməd Əsəd bəy İtaliyaya üz tutaraq Pozitano şəhərinə pənah gətirmişdi. Hətta dünya şöhrətli aktrisa Sofi Loren də burada yaşayır və ən gözəl malikanələrdən biri də ona məxsusdur.

Özgür Bəy