Zirinci "Şimal limonu" da adlandırırlar.

Bu, səbəbsiz deyil. Çünki zirinc C vitamini ilə zəngindir, tərkibində orqanik turşular, alkolidlər, efir yağları, pektinlər və s. faydalı maddələr var.

Onews.az xəbər verir ki, bu bitki haqqında həkim-fitoterapevt, apiterapevt, bitkilər üzrə elmi işçi Elnur Eldaroğlu özünün "Facebook" səhifəsində yazıb.

O vurğulayıb ki, zirinc ağır qidaların həzmini sürətləndirir və asanlaşdırır. Ona görə də tez-tez xörəklərə əlavə olunması məsləhətdir.

Antibakterial və virus əleyhinə etibarlı vasitədir, iltihabı azaldır. Dəmlənməsi öskürək, angina, nəfəs orqanlarının iltihabı zamanı çox yaxşı effekt verir. Dəmləmə zamanı bir çay qaşığı qurudulmuş zirinc meyvəsi bir fincan qaynar suda yarım saat saxlanılır, çay qaşığının yarısı həcmində bal əlavə olunur.

Zirincin tərkibində olan "berberin" maddəsi güclü iltihabəleyhinə təsirə malik olduğundan qaraciyər və öd kisəsində iltihabları azaldır, ödün ifrazını yaxşılaşdırır.

Həkim qaraciyər və ödün sağlamlığı üçün faydalı olan zirinc dəmləməsinin reseptini də bölüşüb.

"1 x.q. zirinci 1 stəkan isti suda yarım saat ərzində dəmləyin, sonra gündə 3 dəfə stəkanın 1/3 hissəsi olmaqla qəbul edin. Dəmləməyə bal əlavə edə bilərsiniz. Bu dəmləmə həmçinin soyuqdəymə zamanı çox yaxşı kömək edir", - deyə Dr. Eldaroğlu tövsiyə edib.