Fransa prezidenti Emmanuel Makronun BMT tribunasından səsləndirdiyi fikirlərin heç biri sağlam siyasi məntiqə söykənmir. Son dövrlər Fransa prezidentinin addımlarında və hərəkətlərində şizofreniya əlamətləri hökm sürür.

Məhz onun yürütdüyü uğursuz siyasət nəticəsində Fransanın Afrikadakı əl-ayaqları gödəlməyə başladı. İmperalist fransız ordusu bir sıra Afrika ölkəsindən çıxmalı oldu. Yeni Kaledoniyada da vəziyyət Fransanın xeyrinə deyil. Üstəlik, bu məmləkət Azərbaycanın 44 günlük savaşda birlik və zəfər simvolu olan “dəmir yumruq” simgəsini özünün azadlıq simgəsi elan etdi. Makron isə bütün bunları həzm edə bilmir.

Ümumiyyətlə Fransa siyasi tarixinin “qara ləkəsi” sayılan bu şəxsin fikirlərində də kifayət qədər ziddiyyətlə mövcuddur. Makron 44 günlük savaşdan sonra Azərbaycana qarşı sanksiya məsələsi gündəmə gələndə özü bunun əleyhinə çıxaraq söyləmişdi ki, Qarabağdakı vəziyyətə görə Azərbaycana qarşı sanksiyaların tətbiqi əks-effekt verəcək. Sonra da Fransanın birinci şəxsi söyləyirdi ki, İndi Azərbaycana qarşı sanksiyaların vaxtı deyil, onlar əhəmiyyətsiz olacaq.

Bəli, Makron o zaman doğru düşünürdü. Bilirdi ki, Azərbaycan qalib dövlətdir, üstəlik, Cənubi Qafqazın əsas nəfəsliyidir. Regionun lider dövləti olduğumuzu indi də Fransada çox yaxşı başa düşürlər. Amma Makron Azərbaycana qarşı hədyanlar səsləndirməyə məcburdur. Çünki onu hakimiyyətə erməni lobbisinin vəsaiti hakimiyyətə gətirib. İndi vaxtilə Makrona maliyyə donorluğu edən ermənilər Onun çənəsindən və yaxasından yapışıblar ki, Azərbaycana qarşı təzyiqləri artırsın.

Bu adam da “xala xətrin qalmasın” prinsipi ilə erməni lobbisi qarşısındakı “borcunu” BMT tribunasından ödəməyə çalışır.

Baxın, Fransa ən ali səviyyələrdə Azərbaycan torpaqlarının Ermənistan tərəfindən otuz il ərzində işğalına dəstək verib. Eyni zamanda, bir milyon azərbaycanlının Ermənistandan və işğal olunmuş Azərbaycan ərazilərindən qovulmasına göz yumub. Vaxtilə münaqişənin dinc yolla həlli üçün atılan addımlara da rəsmi Paris bu və ya digər formada qarşı çıxmışdı.

Düşünürəm ki, Fransanın üzdəniraq və çirkli pulların yuyulması ilə hakimiyyətə gəlmiş rəhbərinin indi sülhə və beynəlxalq hüquqa istinad etməsi olduqca ikiüzlü yanaşmadır. Ən əsası bütün bunlar qəbuledilməzdir. Fransanın bu cür addımları onun özünə qarşı nifrəti artıracaq.

Əlcəzair başda olmaqla, Afrika ölkələri, eləcə də MDB məkanındakı ölkələr Azərbaycanın yanında dayanacaqlar. Hələ bizim İsrail, Pakistan və Türkiyə kimi güclü tərəfdaşlarımızın bizə verəcəyi siyasi-mənəvi dəstəyi dilə gətirmirəm. Bir sözlə, Makronun Azərbaycana qarşı qurmaq istədiyi oyunlar onun özünü tələyə salacaq. Çünki Ermənistanı da, Fransanı da dünyada çox yaxşı tanıyırlar.

Bu iki “soyqırımı ixracatçısı” ölkənin bir-birini dəstəkləməkdən başqa çarəsi də yoxdur. Çünki həm İrəvan, həm də Paris zaman-zaman siyasi terror mərkəzi kimi dünyada ad çıxarmağı bacarıb. Makronun bu addımları Ermənistanla yanaşı, elə Fransanı da uçuruma aparır. Biz də Makronun bu cür bəyanatlarına qarşı öz mövqeyimizi ortaya qoyuruq.

Deyirik ki, Ermənistanı silahlandırmasını və digər pozucu əməllərini dərhal dayandırmalıdır. Əks təqdirdə, ikinci dəmir yumruğun təzyiqi Ermənistanla yanaşı, Makronun siyasi nüfuzunu da yerlə bir edəcək.

Sona Əliyeva
V çağırış Milli Məclisin deputatı
Onews.az