Bakı, 2024-Sabuncu rayonu 142 nömrəli tam orta məktəbdə “Performansı Yaxşılaşdırmaq Üçün Beynəlxalq Tədris Modeli” adlı layihənin açılışı baş tutdu. Bu layihə Təhsildə İnkişaf və Innovasiya üzrə 8-ci qrant müsabiqəsi çərçivəsində icra olunur. Açılış mərasimində məktəbin direktoru, müəllimlər, Khan Academy-nin Azərbaycandakı nümayəndəsi və şagirdlər iştirak edirdi. Mərasim praktiki şəkildə keçirildi, burada layihə haqqında şagirdlərə ətraflı məlumat verildi və eyni zamanda platforma üzərindən interaktiv tapşırıqlar təqdim olundu. Şagirdlərin layihədə iştirak etməyə olan həvəsi gözlə görünürdü.

Təhsil sahəsində öyrənənlər arasında performans fərqliliyi geniş yayılmış bir fenomendir. Bəzi tələbələr tədris materialını asanlıqla başa düşərək yüksək nəticələr əldə edə bilərkən, digərləri üçün bu proses daha çətin olur, bu da onları geri qalma riski ilə qarşı-qarşıya qoyur. Performans fərqliliyinin səbəbləri arasında fərqli öyrənmə stilləri, motivasiya səviyyələri, müəllimlərin tədris təcrübələri və valideynlərin təhsil səviyyəsi kimi amillər var.

Bu fərqlilik təhsil müəssisələri üçün ciddi bir məsələdir, çünki müasir şagird tələbatları dəyişir. Hər bir şagirdin potensialını maksimuma çıxarmaq, onların təhsil alqoritmlərinə uyğunlaşdırılmasını tələb edir. Bu baxımdan, performansı yaxşılaşdırmaq üçün beynəlxalq standartlara əsaslanan bir təhsil modelinin tətbiqi tələbələrin müxtəlif ehtiyaclarını qarşılaya biləcək və hər bir tələbəyə uyğun dəstək təmin edə biləcək.

Layihənin məqsədi zəif göstəriciyə malik olan şagirdlərin dəstəklənməsini təmin etmək və onların performanslarını yaxşılaşdırmaq üçün bir tədris modeli təqdim etməkdir. Khan Academy tədris modeli, şagirdlərin aşağı nəticə göstərən mövzuların dəyərləndirilməsi ilə başlayaraq, onların bilik və bacarıqlarının inkişafı üçün uyğun metodologiyaların seçilməsi ilə davam edəcəkdir. Bu modelin əsas məqsədi, heç bir tələbənin geri qalma riski ilə qarşılaşmamasını təmin etmək və hər bir şagirdin potensialını maksimuma çıxarmaq üçün müəyyən bir dəstək strukturu yaratmaqdır.

Bu məqsədlə, şagirdlərin ən çox aşağı performans göstərən riyaziyyat və həndəsə üzrə biliklərinin inkişafı üçün dünyaca məşhur onlayn təhsil platforması Khan Academy-nin (www.az.khanacademy.org) resurslarından istifadə olunacaq. Khan Academy vasitəsilə innovativ yollarla şagirdlərin riyaziyyat və həndəsə üzrə biliklərinin inkişafı təmin olunacağına inanırıq. Nəzərə alsaq ki, Khan Academy platforması sıfırdan öyrənməni təşviq edir və həndəsə və riyaziyyat mövzuları bir-birinə bağlıdır, əgər şagird öyrənmə prosesində bir mövzunu buraxıbsa, gələcək mövzuların qavranılması çətinləşir.

Layihə, həmçinin, məktəbin müəllimlərinin peşəkar inkişafını dəstəkləyəcək, bu yolla daha effektli tədris mühiti yaratmağa imkan tanıyacaq. Sabuncu rayonu 142 nömrəli tam orta məktəbdə həyata keçirilən bu layihənin təhsil sistemində müsbət dəyişikliklərə səbəb olacağına inanırıq.