"Yeni ilin ilk saatlarından başlayaraq Rusiya-Ukrayna savaşı yeni mərhələyə qədəm qoyacaq. Təxminən iki-üç həftəni əhatə edəcək bu mərhələ şiddətli həmlələrlə, ərazi uğrunda savaşlarla yadda qalacaq. Hər iki tərəf Donald Tramp dönəminin sülh danışıqları prosesinə əlini və mövqeyini gücləndirərək qatılmaq istəyir".

Bunu Onews.az-a açıqlamasında siyasi şərhçi Tural Turan deyib.

Ekspertin fikrincə, Ukrayna həmin 2-3 həftəlik dönəmdə elə də şanslı görünmür:

"Ukraynanın himayədarları tərəddüd içərisindədir. Onlardan bir çoxu Rusiya ilə savaşın əleyhinədir. Ukraynaya vəd edilən silahlar da zamanında ünvanına çatdırılmır. Hər kəs maliyyə və silah yardımı ayırdığını söyləyir. Amma Ukraynanın arzuladığı və istədiyi vaxtda həmin silahların imkanından yararlanmaq bu və ya digər dərəcədə müşkülə çevrilir. Rusiya isə ön xəttə əlavə qüvvələr cəmləyir. Çox güman ki, ruslar Dombas istiqamətində bir xeyli irəliləyəcək. Ukrayna isə Kursk və Belqorodda üstünlüyünü möhkəmləndirməyə çalışacaq. İkinci dünya savaşında olduğu kimi Kursk bu dəfə də müharibənin dönüş nöqtəsi ola bilər. Amma Ukrayna prezidentinin son açıqlamaları onu göstərir ki, Kiyevin döyüş imkanları tükənir. Ona görə də ukraynalılar mümkün qədər tez danışıqlar masasına oturmaq istəyirlər. Bunun üçün Rusiya üzərində həlledici lokal qələbələr mütləqdir. Bu, Kiyevin gizli qələbə planının da bir tərkib hissəsidir".

Fuad Süleyman