Gürcüstanın baş naziri İrakli Kobaxidze müxalifətin ölkədəki parlament seçkilərində pozuntuların olması ilə bağlı ittihamlarını rədd edib və təkrar seçkilərin olmayacağını bildirib.

Onews.az xəbər verir ki, bu barədə hökumət başçısı jurnalistlərə açıqlamasında bildirib.

Onun sözlərinə görə, prezident Salome Zurabişvili və saxtakarlıq faktlarını açıq şəkildə bəyan edən müxalifət liderləri prokurorluqla əməkdaşlıqdan imtina edir və yeni seçkilərin keçirilməsini tələb edirlər:

"Tezliklə Mərkəzi Seçki Komissiyası (MSK) seçkilərin nəticələrinə yekun vuracaq. Bundan sonra ayın sonuna kimi parlamentin ilk iclası keçiriləcək və hökumət üzvləri təsdiqlənəcək. Müxalifətə gəlincə, paralel gündəm yaratmağa çalışsalar da, buna nail ola bilməyəcəklər və hesab edirəm ki, müxalifət parlamentə girəcək. Lakin yenə də, onların parlamentə daxil olub-olmaması onların öz işidir", - deyə Kobaxidze bildirib.

O, həmçinin qeyd edib ki, Gürcüstanda keçirilən seçkilərin keyfiyyəti ABŞ və Moldova seçkilərindən qat-qat yüksək olub.

Elgiz