Bura dünyanın ən sirli və qorxulu nöqtələrindəndir.

O qədər qorxuludur ki, bura “Şeytan üçbucağı” da deyirlər.
Qorxulu burulğanların at oynadıb hamını mat qoyduğu bu sir dağarcığının içərisinə düşüb oradan sağ-salamat geri qayıdan hələ ki, olmayıb.
Uzun illərdir ki, alimlər bu “Şeytan üçbucağı”nın başına dolansalar da, onun sirli sandığında nələrin saxlandığını aydınlaşdıra bilmirlər.

Onews.az xəbər verir ki, söhbət neçə-neçə gəmiləri, təyyarələri yoxa çıxaran, onlara “itkin” damğası vuran Bermud üçbucağından gedir.

Hələ 1502-ci ildə adanı kəşf edən Bermudes buranı gəmilər üçün təhlükəli olan sualtı qayalar, “qəfil dayazlıqlar”la əhatə olunduğunu öz gündəliyinə qeyd etmişdi.
Bermud üçbucağı Atlantik okeanın şimalında Florida, Bermud adaları və Puerto-Rikonu birləşdirən şərti xətlərin əhatə etdiyi üçbucaq ərazidir.

Bu qorxu və vahimə yuvası təqribən yarım milyon kvadrat mil sahəni tutur.
Son yüz ildə 100-dən çox gəmi və təyyarələr burada naməlum şəraitdə yoxa çıxır.

Onların sonrakı aqibəti ilə bağlı bu günə qədər hər hansı məlumat əldə etmək mümkün olmur.
Hətta dənizin dibinə bir neçə dəfə ekspedisiya qrupu göndərilməsinə cəhdlər göstərilir.
Amma yenə də bir nəticə əldə edilmir.
1840-cı ildə Baham adalarının paytaxtı olan Nassau limanının yaxınlığında Fransanın "Rozali" gəmisi aşkarlanır.

Əla vəziyyətdə olan gəmidə hər şey qaydasında idi, bircə şeydən başqa...
Gəmi heyəti yoxa çıxmışdı...
Gəminin jurnalında heyyətin başına gələn hadisə barədə heç bir qeyd aparılmamışdı.
Bununla da "Bermud üçbucağı"-nın qeyri-adi tarixçəsi başlayır.

Bu tarixçənin səhifələrində 103 ton su tutumu olan "Mariya Çelesta" gəmisinin başına gələn müəmmalı hadisə xüsusi yer tutur.
Hadisə 7 noyabr 1872-ci ildə baş verir.
Aşkar olunan bu gəminin də heyəti yoxa çıxır.

Çox keçmir ki, kerosin yükü ilə Nyu-Yorkdan Genuaya istiqamət alan "Dei Qratia" gəmisi Azor adaları rayonunda aşkarlanır.
Gəminin göyərtəsində heç kim yox idi.

Yaxınlıqdan keçən gəminin kapitanı Morxaus səsgücləndirici vasitəsilə gəmidə kiminsə olmasını yoxlamaq istəyir, lakin cavab gəlmir.
20 oktyabr 1902-ci il. Atlantik okeanında Almaniyanın "Freya" ticarət gəmisinə rast gəlinir
Yenə də gəmidə heyyət yoxa çıxmışdı.
4 mart 1918-ci il... ABŞ-nın 12 min ton su tutumu olan "Siklop" gəmisi 309 nəfər heyyət üzvü ilə Barbados adasından səfərə çıxır.

Baltimora istiqamət götürən "Siklop" təyin olunan yerə gəlib çatmır.
Hər hansı bir həyəcən siqnalı da qeydə alınmır.
Vahimə zonasındakı ən məşhur hadisə isə "Meri Selist" gəmisinin "Bermud üçbucağında" yoxa çıxmasıdır.

Lakin çox sonralar – 1872 "Deja Qrasiya" adlanan ingilis gəmisi təsadüfən "Meri Selist" gəmisinə rast gəlir.
Bu hadisədə maraqlısı odur ki, gəmidə heç bir həyat əlaməti olmasa da, buradakı bütün əşyalar, sənədlər, çarpayılar, stol, ərzaq və s. səliqə ilə yerində qalmışdı.
Sözügedən zonada son 27 ildə mindən çox adam itkin düşür
Lakin axtarışlar zamanı bir dənə də olsun meyid və digər əlamətlər aşkar olunmur.
Ötən əsrin ortalarında kahinlər buranı “ölüm beşiyi” adlandırırdılar.

Bermud üçbucağı burada çoxlu itmiş obyektə görə sirli yer və anormal zona sayılır.
Bəzən təyyarə və ya gəmilərin birdən yoxa çıxması, yenidən görünməsi, vaxtından əvvəl təyinat yerinə çatması kimi hadisələr də baş verir.
Hələ 1950-ci illərin sonlarında bu sahə gəmilərin, qayıqların və təyyarələrin itdiyi yüksək qəza bölgəsi kimi qeyd olunur.
Dünyanın nüfuzlu beyin mərkəzləri buranı “naməlum fizika qanunlarının etibarlı olduğu nöqtə” kimi təqdim edir.

Yoxa çıxan təyyarə və gəmilərin sayı artdıqca bura fizika qanunlarının işləmədiyi, qeyri-adi bölgə kimi məşhurlaşır.
Hətta bəziləri buranı “lənətlənmiş bölgə” də adlandırmaqdan çəkinmir.
1964-cü ildə Vinsent Qaddis adlı amerikalı yazıçı “Arqosy” jurnalında tarixdə ilk dəfə olaraq "Bermud üçbucağı" ifadəsini işlədir.

Bermud üçbucağı 1970-ci illərdə Çalz Berliçin “Bermud üçbucağı” adlı bestselleri çap edildikdən sonra daha da məşhurlaşır.
Onun faktiki sahəsinin Mayami, San Xuan, Puerto-Riko və Bermud adalarının birləşdiyi “kor nöqtə” olaraq göstərir.

Lakin digər alimlər onun bu fikirlərini heç də ciddiyə almırlar.
Onların fikrincə, “Bermud üçbucağı”nın ümumi sahəsi 1.3 milyon km2-dən 3.9 milyon km2 arasında dəyişir.

Bəs təyyarələr, gəmilər niyə məhz burada itkin düşürlər?

Bəzi alimlərin fikrincə, həmin zona tufan və qasırğalar baxımından çox təhlükəli zona sayılır.
Xüsusilə “Qolfstrim” cərəyanının oradan keçməsi onu göstərir ki, “Bermud” sirrinin çoxlu araşdırılmamış tərəfləri var.

İnsanları narahat edən və qorxudan, minlərlə insanın yox olduğu, bir-birinin ardınca bir çox sirlər saxlayan bu möcüzə nədir? İnsanlar hara yox olur? Naməlum dünyaya düşür, yoxsa sirli kosmik varlıqlar tərəfindən əsir götürülür?
Alimlərin inandırıcı olmayan teoremləri çoxaldıqca bir çoxları düşünür ki, qeybə çəkilən təyyarə və gəmiləri, insanları UNO-lar əsir götürür.
Hətta onların paralel dünyaya götürüldüklərini düşünənlər də var.

Amma indiyə qədər bir başı papaqlı alim qorxulu qəza üçbucağı ilə bağlı əsl həqiqətləri üzə çıxarmaqda acizdir.

Görünür, milyonlarla insanın qorxuluğunu götürəcək həmin fakt elə tanrının özündə gizlidir.

Turan