Onun NATO-dakı kod adı “Hind”dir.

1970-ci illərdə Sovet İttifaqında ən çevik hərbi nəqliyyat vasitəsi sayılırdı.
Amerikalılar onu “yuxusuz cırcırama” adlandırırdılar.
SSRİ-dəki pilotlar isə ona “uçan tank” adını vermişdilər.
Xarici görünüşünə görə digər adı isə "Timsah"dır.

Onews.az xəbər verir ki, söhbət əfsanəvi “Mi-24”hücum və nəqliyyat helikopterindən gedir.

İstehsalı “Mil” Moskva Helikopter Zavodu tərəfindən həyata keçirilir.
İlk uçuşunu 1969-cu ildə gerçəkləşdirir.
1972-ci ildən etibarən başda Sovet İttifaqının hava arsenalına daxil olur.

Sonralar bir çox ölkənin hərbi hava qüvvələri tərəfindən istifadəyə qəbul edilir.
Azərbaycan Hərbi Hava Qüvvələrində də onların sayı yetərincədir.

“Mi-24” hərb tarixində ilk hücum helikopterlərindən biridir.

Korpusu olduqca möhkəm zirehlə örtülüdür.

Eyni anda 8 əsgər, yük və sursat daşıma imkanına malikdir.
Zəif cəhəti yüksək səviyyəli manevr bacarığına sahib olmamasıdır.
Bu helikopterlər kəskin dönüşlər zamanı tez-tez qəza vəziyyətinə düşür.
Mütəxəssislər 50 ildən artıqdır ki, bu çatışmazlığı aradan qaldıra bilmirlər.

“Mi-24” helikopterinin ilk döyüş tətbiqi Efiopiya ilə Somali arasında baş vermiş Oqaden müharibəsinə təsadüf edir.
Helikopterlər Sovet İttifaqının hərbi yardımı olaraq Efiopiyaya təhvil verilmişdi.
“Mİ-24”ün sayəsində efiopiyalılar 1978-ci ilin əvvəlinə qədər Oqadeni yenidən nəzarət altına ala bilirlər.
“Mi-24”lər Əfqanıstan müharibəsi ərzində mücahidlərin mövqelərinin bombardman edilməsində aktiv istifadə olunurdu.

Sonralar ABŞ mücahidləri daşına bilən zenit-raket qurğusu olan Stingerlə təchiz edirlər.
Beləliklə, “Mi-8” və “Mi-24” helikopterləri əfqan döyüşçülərin əsas hədəflərinə çevrilir.
Birinci və ikinci Qarabağ müharibəsində də “Mi-24”lər tez-tez qarşı-qarşıya gəlirlər.
Ermənilər 30 illik savaş ərzində 15-ə yaxın “Mi-24” helikopteri itirdiklərini etiraf edirlər.

Turan