"İnanırıq ki, ilin sonuna qədər mənfi saldo azalacaq və ehtiyatlar yenidən bərpa olunacaq".

Onews.az xəbər verir ki, bu barədə Gürcüstan Milli Bankın prezidenti vəzifəsini icra edən Natia Turnava açıqlama verib.

O bildirib ki, Milli Bank larini dəyərdə saxlamaq üçün ilin əvvəlindən ehtiyatda olan vəsaitdən 540 milyon ABŞ dolları satış həyata keçirib:

“Noyabrın 8-nə görə, ilin əvvəlindən Milli Bank valyuta hərracında 540 milyon dollar satış həyata keçirib. Hazırda bazardakı təzyiqlər aradan qaldırılıb. ilin sonunda biz bu kəsiri azaldacağıq və ehtiyatları yenidən bərpa edə biləcəyik. Əlbəttə ki, ilin sonuna qədər biz bunu tamamilə aradan qaldıra bilməyəcəyik, lakin indiki vəziyyət alışa başlamağa imkan verir”, - deyə Turnava bildirib.

Milli Bank rəsmisi qeyd edib ki, seçkiqabağı ajiotaja görə dollara tələbat artıb və belə bir məqamda Milli Bank bazarda bu müvəqqəti həyəcanı söndürməyə borclu idi:

“Əgər biz bu müdaxiləni etməsəydik, inanın mənə, larinin dərhal devalvasiyası baş verərdi ki, bu da əhalimizi yoxsullaşdıracaq, biznesi yoxsullaşdıracaq, bu qədər zəhmətlə qurulan lariyə inamı sarsıdacaqdı və geriyə dönmək daha çətin olardı", - deyə Natia Turnava qeyd edib.

Turan