Fransa Prezidenti Emmanuel Makron, Almaniya Kansleri Olaf Şolz və Polşanın Baş Naziri Donald Tusk birgə bəyanatla çıxış edərək, Gürcüstandakı mövcud siyasi vəziyyətdən narahat olduqlarını ifadə ediblər.

Onews.az xəbər verir ki, bu barədə Reuters agentliyi məlumat yayıb.

Bəyanatda Veymar üçbucağı formatının üzvləri olaraq, Gürcüstanın Avropa İttifaqına üzvlük danışıqlarına başlaya bilməsi üçün ciddi islahatlar aparmalı olduğunu vurğulayıblar.

Liderlər, Gürcüstan hökumətini seçkilərlə bağlı pozuntuları tez və şəffaf şəkildə araşdırmağa çağırıblar:

“Beynəlxalq monitorinq missiyasının ilkin rəylərində göstərildiyi kimi, Gürcüstanda parlament seçkilərinin keçirilməsi ilə bağlı narahatlığımızı təkrar edirik. Xüsusilə, əhalinin prosesə etimadına mənfi təsir göstərən çoxsaylı qanun pozuntuları və seçicilərin təhdid edilməsi ilə bağlı məlumatlar narahatlıq doğurur. Biz seçkilərlə bağlı qanun pozuntularına dair bütün şikayət və hesabatların operativ və şəffaf şəkildə araşdırılmasına çağırırıq və beynəlxalq müşahidə missiyasının vaxtında gözlədiyimiz yekun hesabatını diqqətlə nəzərdən keçirəcəyik. Əgər Gürcüstan hazırkı kursunu dəyişməsə və islahatlarla bağlı, xüsusən də Avropa dəyərlərinə və prinsiplərinə zidd olan son qanunvericiliyi ləğv etməklə ciddi səylər göstərməsə, biz Gürcüstanla üzvlük danışıqlarının açılmasının tərəfdarı ola bilmərik”, - deyə bəyanatda vurğulanıb.
Liderlər qeyd ediblər ki, onlar gürcü xalqının demokratik və avropalı arzularını dəstəkləməyə davam edəcəklər.

Turan