"2023-cü ildə müxtəlif aktorlar tərəfindən Gürcüstanda siyasi vəziyyətin gərginləşməsi və hakimiyyətin zorakılıqla dəyişməsi üçün zəmin hazırlamaq cəhdi olub".

Onews.az-ın Tiflis bürosu xəbər verir ki, bu barədə Gürcüstanın Dövlət Təhlükəsizlik Xidmətinin rəhbəri Qriqol Liluaşvili parlamentdə 2023-cü ilin hesabatı zamanı deyib.

Onun sözlərinə görə, digər səlahiyyətli qurumlarla razılaşdırılaraq qeyd olunan cəhdlərin zərərsizləşdirilməsi üçün bütün zəruri qabaqlayıcı tədbirlər görülüb və bununla da son nəticədə ölkədə dağıdıcı proseslərin inkişafının qarşısını almaq mümkün olub.

Bundan başqa, Liluaşvili izah edib ki, 2023-cü ildə Dövlət Təhlükəsizliyi Xidmətinin əks-kəşfiyyat fəaliyyəti çərçivəsində Gürcüstanda baş verən siyasi və sosial-iqtisadi proseslərin xarici dövlətlərin xüsusi xidmət orqanlarının xüsusi marağına səbəb olduğu aşkarlanıb:

"Rusiya-Ukrayna müharibəsi fonunda beynəlxalq gəmiçilik baxımından dəyişmiş şərtlərlə əlaqədar olaraq, xarici və gürcü qrupları və qüvvələri tərəfindən Gürcüstan ərazisindən yeni nəqliyyat dəhlizlərinin açılması perspektivləri və planlarına maraq artıb.

2023-cü ildə Dövlət Təhlükəsizliyi Xidmətinin əks-kəşfiyyat fəaliyyəti çərçivəsində xarici dövlətlərin xüsusi xidmət orqanlarının Gürcüstanda gedən siyasi və sosial-iqtisadi proseslər, ictimai əhval-ruhiyyə, siyasi partiyaların reytinqləri və onların şansları ilə xüsusi maraqlandığı aşkarlanıb.

2023-cü ildə etnik və dini azlıqların məskunlaşdığı regionlarda narazılıq və qarşıdurma doğurmaq təhlükəsi yaradan media, sosial şəbəkələr və internetdən istifadə edərək məqsədyönlü bəyanatların olması faktını vurğulamaq da yerinə düşər”, - deyə SUS rəhbəri bildirib.

Bundan əlavə, Qriqol Liluaşvili qeyd edib ki, əks-kəşfiyyat fəaliyyəti çərçivəsində miqrasiya kanallarının və axınlarının monitorinqi xidmətin prioritet istiqamətlərindən biridir.

DTX sədri Parlamentin plenar iclasından sonra jurnalistlərin ABŞ-ın viza sanksiyaları ilə bağlı suallarını cavablandırıb. O deyib ki, sanksiya strateji tərəfdaş, dost ölkələrin bir-biri ilə danışmalı olduğu ton deyil, baxmayaraq ki, siyasi temperaturun aşağı düşəcəyinə ümid olunur.

Liluaşvilinin sözlərinə görə, agentlik səviyyəsində Gürcüstanın ABŞ-la ideal münasibətləri var, tərəfdaşlıq davam edir və bir an belə dayanmayıb.

Elgiz Borçalı