“ABŞ və Ermənistan arasında imzalanan strateji tərəfdaşlıq haqqında xartiyanın hələlik Azərbaycan üçün hər hansı bir təhlükəsi hiss edilmir. Çünki bizim heç bir ölkənin torpağında gözümüz yoxdur. Bu xartiyadan daha çox İranla Rusiya narahat olmalıdırlar. İrəvan Vaşinqtonla imzaladığı bu sənədlə həm Tehrana, həm də Moskvaya növbəti dəfə badalaq verdi”.

Bunu Onews.az-a siyasi şərhçi Tural Turan deyib.

Ekspertin fikrincə, artıq Kreml və Tehran Ermənistanla ABŞ arasındakı bu sazişdən “qarınağrısı”na düşüblər:

“Bizim İrəvanla iki ilişiyimiz qalıb. Bunlardan biri Zəngəzur dəhlizinin açılması, digəri isə işğalçı qonşularımızla sülh sazişinin imzalanmasıdır. Bu konteksdə məlum xartiyanın imzalanması Bakı üçün təhlükəli sayıla bilməz. Amma xartiyada göstərilir ki, tərəflər Avroatlantik məkana inteqrasiyanın tərəfdarıdır. Bu, birbaşa Kremlin damarına basmaqdır, eyni zamanda, gələcəkdə ABŞ hərbi bazalarının İran-Ermənistan sərhədində yerləşdirilməsi anlamına gəlir. İrəvan yenə də Tehrana və Moskvaya arxadan zərbə vurdu. Yəqin ki, Moskva Nikol Paşinyan üçün “sürpriz cavab” hazırlayacaq. Tehran isə sadəcə “təəssüflənməklə” kifayətlənəcək. Bu sənəd ABŞ-ın Ermənistanda möhkəmlənməsinin bünövrəsidir. Yəni Tehranın və Moskvanın Güney Qafqazla bağlı maraqları adıçəkilən xartiya ilə tarixə “gömülmüş” oldu”. İndi Ermənistan bu xartiyanın hesabatını regiondakı müttəfiqlərinə necə verəcəyi maraqlıdır. Güman ki, yaxın günlərdə Kreml İrəvanı çalxalamağa cəhd göstərəcək”.

Banu Murad