Ermənistan tərəfi tələm-tələsik sülh sazişinin imzalanmasının tərəfdarıdır.

Buna görə də işğalçı ölkənin Baş naziri Nikol Paşinyan əl-ayağa düşüb. Nikol Vovayeviç 2026-cı ildə baş tutacaq seçkilərə hazırlaşır. Ona görə də seçicilərinin qarşısına əliboş çıxmaq istəmir. Çünki xalq ondan 8 ilin nəticələrini istəyəcək. Amma Azərbaycan tərəfinin şərtləri də ortadadır və aydındır; Ermənistan Azərbaycan və Türkiyəyə qarşı ərazi iddialarından əl çəkməlidir.

Bunun üçün mövcud konstitusiyaya dəyişikliklər edilməlidir. Referendumun konkret vaxtı təyin olunmalıdır və məsələyə birdəfəlik yekun vurulmalıdır. Nikol Paşinyan bölgə dövlətlərinə zəng edərək sülhə ona görə hazır olduğunu dilə gətirir ki, bununla Azərbaycanı təzyiq altına alacağını düşünür. Bəli, sülh sazişi üçün razılaşdırılmayan iki bənd üzrə də razılıq əldə olunub. Amma ərazi iddiaları məsələsi rəsmi həllini tapmayıb.

Üstəlik, Ermənistan son iki-üç gün ərzində bir neçə dəfə ərazilərimizə qarşı təxribatlar törədib. Nəticədə hər an əldə olunmuş razılaşmalar zədələnə bilər. Üstəlik, bu cür addımlar avropalı və rusiyalı rəsmilərin Azərbaycana səfərləri çərçivəsində gerçəkləşir.

Düşünürəm ki, Ermənistanın baş naziri sülh sazişinə tələm-tələsik yekun vurmaqla həm də Qərbdəki havadarları önündə də hesabat vermək istəyir. Bütün bunlar onu deməyə əsas verir ki, İrəvan 37 illik münaqişənin tarixə qovuşmasında da səmimi deyil. Sülh istəyən ölkə cəbhə xəttində atəşkəsi pozmaz.

Sərhəddə mühəndis-istehkam prosesləri aparmaz. Ən əsası, Azərbaycanla sərhəddə əlavə qoşun hissələri göndərməz. Bütün bunlar onu deməyə əsas verir ki, İrəvan qarşıdakı təxribatlar öncəsi özünü təmizə çıxarmaq üçün "sağlam bünövrə" hazırlayır. Hətta cəbhədəki təxribatları da Azərbaycanın üzərinə atmağa cəhdlər edəcək. Rəsmi Bakı isə İrəvanın bu "sakit həmlələri" qarşısında hazır olmalıdır. Çünki biz beş il əvvəl də düşmənin bu cür tülkü həmlələrinə şahidlik etmişik.

Sona Əliyeva
V çağırış Milli Məclisin deputatı
Onews.az