“Gürcü arzusu” siyasi şurasının qərarına əsasən, İrakli Kobaxidzenin yenidən baş nazir postuna namizədliyi irəli sürülüb.

Onews.az xəbər verir ki, bu barədə “Gürcü Arzusu”nun icraçı katibi Mamuka Mdinaradze Siyasi Şuranın iclasından sonra bildirib.

Onun sözlərinə görə, Şalva Papuaşvilinin isə yenidən parlamentin sədri vəzifəsinə namizədliyi irəli sürüləcək:

“Siyasi şuranın iclası keçirildi, orada cari siyasi məsələlərlə yanaşı, ilin sonuna qədər müxtəlif məsələləri müzakirə etdik. Bizim nizamnaməmizə əsasən, partiyanın fəxri sədrinin (Bidzina İvanişvilinin) Baş nazir vəzifəsinə namizəd irəli sürmək səlahiyyəti var və o, İrakli Kobaxidzeni bu vəzifəyə namizəd kimi təqdim etməsi yəqin ki, sürpriz olmayacaq. Təbii ki, Siyasi Şura onu tam dəstəklədi. Həmçinin “Gürcü Arzusu” fraksiyası parlamentin spikeri vəzifəsinə Şalva Papuaşvilinin namizədliyini irəli sürəcək. Biz yaxın günlərdə Gürcüstan parlamentinin ilk iclasının keçiriləcəyi vaxtı müəyyən edəcəyik”, - deyə Mamuka Mdinaradze bildirib.

Qeyd edək ki, İ.Kobaxidze 2016–2019-cu illərdə Gürcüstan parlamentinin sədri olub. 2019-cu ildə kütləvi etirazların ilk günündə istefa verib. 8 fevral 2024-cü ildən isə Gürcüstanın 16-cı baş naziridir.

Elgiz M.