Nəzrin Əlizadə
YAP Nərimanov rayon təşkilatının məsləhətçisi


Dövlətlər arasında dostluq və həmrəylik münasibətləri regional sabitliyin və dayanıqlı inkişafın əsas amillərindəndir. Tarixi və mədəni yaxınlıq, qarşılıqlı hörmət və ortaq maraqlar Azərbaycan ilə Mərkəzi Asiya ölkələri arasında əlaqələrin inkişafı üçün möhkəm zəmin yaradır. Bu münasibətlərin siyasi, iqtisadi və humanitar sahələrdə genişləndirilməsi həm dövlətlər, həm də xalqlar arasında əlaqələrin güclənməsinə xidmət edir.

2026-cı il oktyabrın 8-də Türkmənistanın Türkmənbaşı şəhərində keçirilən VIII Məşvərət görüşündə Prezident İlham Əliyevin çıxışı regional əməkdaşlığın əhəmiyyətini və gələcək inkişaf istiqamətlərini ön plana çıxarmışdır.

Azərbaycanın Mərkəzi Asiya Dövlət Başçılarının Məşvərət formatında tamhüquqlu iştirakı ölkəmizin regionla əlaqələrinin inkişafında yeni mərhələdir. Bu əməkdaşlıq çərçivəsində dövlətlər arasında siyasi dialoqun davam etdirilməsi, qarşılıqlı səfərlərin artırılması və ortaq məsələlərin müzakirəsi üçün əlavə imkanlar yaranmışdır.

Azərbaycan ilə Mərkəzi Asiya ölkələri arasındakı münasibətlərin mühüm istiqamətlərindən biri humanitar əməkdaşlıqdır. Prezident İlham Əliyev çıxışında qardaş ölkələrin Azərbaycanın işğaldan azad edilmiş ərazilərinin bərpasına verdiyi dəstəyi xüsusi qeyd etmişdir. Türkmənistanın Füzulidə məscid, Özbəkistanın Mirzə Uluqbəy adına məktəb, Qazaxıstanın Kurmanqazı adına Uşaq Yaradıcılıq Mərkəzi, Qırğızıstanın isə Ağdamda Manas adına məktəb inşa etməsi dostluq münasibətlərinin konkret nümunələridir.

Bu təşəbbüslər xalqlar arasında mənəvi bağlılığın möhkəmlənməsinə və gələcək nəsillər arasında qarşılıqlı anlaşmanın inkişafına töhfə verir. Humanitar layihələrin iqtisadi və siyasi əməkdaşlıqla paralel şəkildə inkişaf etdirilməsi dövlətlərarası münasibətlərin daha əhatəli olmasına şərait yaradır.

Regional tərəfdaşlığın digər vacib istiqaməti sülh və təhlükəsizliyin qorunmasıdır. Dövlətlər arasında qarşılıqlı etimadın möhkəmləndirilməsi, dialoqun davam etdirilməsi və ortaq maraqların nəzərə alınması iqtisadi və sosial inkişaf üçün əlverişli mühit formalaşdırır. Buna görə də Məşvərət görüşləri yalnız iqtisadi məsələlərin müzakirəsi deyil, həm də regional sabitliyə xidmət edən əməkdaşlıq platforması kimi əhəmiyyət daşıyır.

Dostluq və həmrəylik dövlətlər arasında münasibətlərin uzunmüddətli inkişafında mühüm yer tutur. Mənim qənaətimə görə, Azərbaycan ilə Mərkəzi Asiya ölkələri arasında humanitar əlaqələrin genişləndirilməsi və qarşılıqlı dəstəyin davam etdirilməsi gələcək əməkdaşlıq üçün xüsusi əhəmiyyətə malikdir. Bu münasibətlərin təhsil, mədəniyyət, iqtisadiyyat və təhlükəsizlik sahələrində inkişafı ortaq məqsədlərin həyata keçirilməsinə kömək edə bilər. Əminəm ki, qarşılıqlı hörmət və əməkdaşlıq prinsiplərinin qorunması regionda sabitliyin möhkəmlənməsinə və xalqlarımız arasında dostluğun gələcək nəsillərə ötürülməsinə xidmət edəcəkdir.