Prezident cənab İlham Əliyev Yeni Azərbaycan Partiyasının VIII qurultayındakı çıxışında Azərbaycanın ictimai-siyasi həyatından, ərazi bütövlüyünün və suverenliyinin bərpasından, ölkənin beynəlxalq mövqeyindən, iqtisadi inkişafından və gələcək vəzifələrindən bəhs etmişdir.Prezident qeyd etmişdir ki, Yeni Azərbaycan Partiyası Azərbaycanın və Cənubi Qafqazın ən böyük siyasi qüvvəsidir. Partiyanın 1992-ci ilin noyabrında Ulu Öndər Heydər Əliyevin rəhbərliyi ilə təsis edilməsi ölkənin gələcək inkişafında mühüm rol oynamışdır.Çıxışda Azərbaycanın hərbi Zəfərlərinin xüsusi əhəmiyyəti vurğulanmışdır. Bildirilmişdir ki, 8 Noyabr – Zəfər Günü və 20 Sentyabr Azərbaycanın tarixində mühüm yer tutur. 2020-ci ildə İkinci Qarabağ müharibəsində qazanılmış qələbə və 2023-cü ildə həyata keçirilmiş antiterror əməliyyatı nəticəsində Azərbaycanın ərazi bütövlüyü və suverenliyi tam bərpa edilmişdir. Prezident şəhidlərin xatirəsinin xalqımızın qəlbində əbədi yaşayacağını qeyd etmişdir.

İlham Əliyev Azərbaycanın müstəqil xarici siyasətindən də danışmışdır. Ölkəmizin beynəlxalq təşkilatlarda mövqeyinin gücləndiyini, müxtəlif dövlətlərlə strateji tərəfdaşlıq münasibətlərinin qurulduğunu bildirmişdir. Azərbaycanın etibarlı tərəfdaş kimi tanındığını, heç bir siyasi düşərgəyə qoşulmadan müstəqil siyasət apardığını vurğulamışdır.

İqtisadi məsələlərə toxunan Prezident investisiyaların cəlb edilməsinin, iqtisadi və maliyyə sabitliyinin qorunmasının vacibliyini qeyd etmişdir. Xarici borcun azaldılması, valyuta ehtiyatlarının artırılması, enerji resurslarının istehsalı və ixracının genişləndirilməsi ölkənin əsas iqtisadi uğurları kimi göstərilmişdir. Həmçinin minimum əməkhaqqının, pensiyaların və sosial müavinətlərin artırılması istiqamətində tədbirlərin davam etdiriləcəyi bildirilmişdir.


Prezident cənab İlham Əliyevin çıxışında ideoloji təhlükəsizliyin fiziki təhlükəsizlik qədər vacib olduğu vurğulanır. Qeyd edilir ki, ideoloji təxribatlar ölkənin daxilinə yönəlir və müasir dövrdə internet, kiberhücumlar və süni intellekt vasitəsilə daha geniş yayılır. Fiziki təhlükəsizliyin təmin olunmasında dövlət sərhədlərinin mühafizəsi mühüm rol oynadığı kimi, ideoloji təhlükəsizliyin qorunması da xüsusi əhəmiyyət daşıyır.

İdeoloji təxribatlardan qorunmağın əsas yolları təhsil və vətənpərvərlikdir. Əhalinin bilikli, savadlı və təhsilli olması yalan məlumatlara, şayiələrə və zərərli ideoloji təsirlərə qarşı müqaviməti gücləndirir. Vətənpərvərlik isə vətəndaşların öz dövlətinə bağlılığını və milli qürur hissini artırır.

Prezident çıxışında Azərbaycanın qazandığı Qələbənin əhəmiyyətini də qeyd edərək dövlətlə fəxr etməyin və milli dəyərləri qorumağın vacibliyini vurğulayır. Nəticə etibarilə, ideoloji təhlükəsizliyin təmin olunması üçün təhsilin inkişafı, vətənpərvərlik ruhunun gücləndirilməsi və cəmiyyətin zərərli ideoloji təsirlərdən qorunması mühüm vəzifələrdəndir.

Çıxışda Azərbaycanın nəqliyyat imkanlarının genişləndirilməsi, Orta Dəhliz və Şimal-Cənub Dəhlizinin inkişafı da mühüm vəzifələr sırasında qeyd olunmuşdur. Bununla yanaşı, Qarabağ və Şərqi Zəngəzurun bərpası, keçmiş məcburi köçkünlərin doğma torpaqlarına qayıdışının sürətləndirilməsi dövlətin əsas prioritetlərindən biri kimi vurğulanmışdır.

Prezident cənab İlham Əliyev çıxışının sonunda Yeni Azərbaycan Partiyasının üzvlərinin qarşıda duran tarixi vəzifələrin həyata keçirilməsində fəal iştirak edəcəklərinə əminliyini bildirmiş və partiyaya yeni qələbələr arzulamışdır.