"İran prezidentinin helikopterinin qəzaya uğraması fars-molla rejiminin "dərin dövlət qanadı"nın planı da ola bilər. Səbəbi sadədir: İndiki hakimiyyətin yarıtmaz fəaliyyəti İran dövlətçiliyinin nüfuzunu xeyli zəiflədib. Ona görə də, qısa zamanda Rəisi və onun nüfuz dairəsində olan hökumətdən ən qısa zamanda qurtulmaq istəyirlər".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, axtarış xilasetmə işlərinin ləng aparılması da bu ehtimalı daha da gücləndirən amillərdəndir:

"Hətta hadisənin ilk saatlarında İran mediası məlumat yaydı ki, pis hava şəraiti səbəbindən qəzaya uğrayan helikopterin havadan axtarışları dayandırılıb. Bundan əvvəl isə prezidentin torpaq yolla Təbrizə aparıldığı, vəziyyətinin yaxşı olduğu bildirilmişdi. Daha sonra ali dini lider Xamneyinin rəhbərliyi altında İran Təhlükəsizlik Şurasının təcili toplandığı vurğulandı. 20-dən çox xilasetmə qrupunun dağlarda prezidenti və onun yoldaşlarını axtardığı söylənildi. Amma bir neçə saat davam edən axtarışlar nəticə vermədi. Ehtimal edilən odur ki, İranın "dərin dövlət qanadı" pis hava şəraiti də daxil olmaqla sui-qəsd planını incəliklə işləyib. Məhz İbrahim Rəisinin dövründə yanlış siyasət İran iqtisadiyyatını uçuruma apardı. Qonşularla münasibət pisləşdi. Əfqanıstan və Pakistanla silahlı qarşıdurma yaşandı. İsrail qarşısında yenik duruma düşdü. İranın öz proksi qüvvələri önündə də nüfuzu yerlə bir oldu. Bütün bunlar Rəisi hakimiyyətindən tez bir zamanda qurtulmaq üçün İranın "dərin dövlət qanadı"nı hərəkətə keçməyə sövq etməli idi".

Türkay