"Qərb yaxın gələcəkdə Gürcüstandakı rusmeyilli iqtidarı devirmək üçün hərəkətə keçəcək. Ən azından buna cəhdlər göstərəcək. Ermənistandan sonra Qərb Gürcüstanda da çevrilişə hazırlaşır. Bu isə Kremlin Cənubi Qafqazdan sıxışdırılması anlamına gəlir".

Bunu Onews.az-a açıqlamasında siyasi şərhçi Tural Turan deyib.

Ekspertin sözlərinə görə, Qərb üçüncü dünya müharibəsi riskini gözə almamaq üçün keçmiş MDB ölkələri vasitəsilə Rusiyaya qarşı "ikinci cəbhə" açmağa çalışacaq:

"İlk növbədə, GUAM ölkələri hədəf taxtasına çəkiləcək. Ukrayna artıq “iliyi vurulmuş qurban” kimi çabalamaqdadır, Qərblə Rusiya arasında de-fakto plasdarma çevrilib. İndi növbə Moldova və Gürcüstanındır. “Sorosçu”lar Gürcüstanda çevriliş missiyasını gerçəkləşdirə bilsələr, o zaman Tiflis də Moskvaya qarşı daha sərt mövqe tutmağa başlayacaq. Hətta növbəti mərhələlərdə Abxaziya və Cənubi Osetiyanın da Ukraynadan sonra plasdarma çevrilməsi mümkündür. Qərbin Rusiyaya qarşı sonuncu “açıq kart”ı isə Azərbaycandır".

Tural Turanın fikrincə, qlobal güclər yaxşı başa düşürlər ki, Azərbaycanı Rusiyaya qarşı qoymağın yeganə yolu Qarabağ müzakirələrindən keçir:

"Əgər Qərb Ermənistanla Azərbaycan arasında böyük sülh müqaviləsinə nail olsa, o zaman rusiyalı sülhməramlıların Qarabağdakı missiyası da bitəcək. Belə olan halda Azərbaycanın Rusiyadan asılılığı da qalmayacaq. Amma rəsmi Bakı Ankara ilə müttəfiq olduğu üçün Qərbin hər istədiyini də yerinə yetirməyəcək. Çünki, ortada iki qardaş dövlətin birgə maraqları məsələsi də var. Rusiyaya qarşı ikinci cəbhənin ilk dosyesini GUAM ölkələri təşkil edir. İkinci dosyedə isə Orta Asiyadakı türk dövlətləri və Tacikistan var. Qərb ikinci həmləsi ilə Avrasiya Gömrük İttifaqını və “Rusiya NATO-su” adlanan KTMT-ni süquta uğradaraq Kremlin Orta Asiya bağlantılarını tamamilə kəsmək istəyir. Yenə deyirəm, bu uzunmüddətli və olduqca mürəkkəb kombinasiyalı bir ssenaridir. Yaxın bir-iki il ərzində gerçəkləşməsi elə də real görünmür”.

Rauf Süleymanlı