​Hər bir şəhərin öz nəfəsi, öz daxili ritmi və heç bir xəritədə yazılmayan, yalnız küçələrini qarış-qarış gəzənlərə bəlli olan gizli qanunları var. İnsan doğulduğu, böyüdüyü, bəzən yorulduğu, bəzən də qırıldığı bu torpaq parçasına min bir tellə bağlanır. Yaxşıları ilə qürur duyar, yamanları ilə için-için sızlayar; amma nə olursa-olsun, keçə bilməz ondan. Çünki şəhər yalnız daşdan, betondan ibarət deyil — o, həm də insanların taledir, xarakteridir, güzgüsüdür.

​Bu şəhər ziddiyyətlərin məskənidir. Bir tərəfdə səssizliyə çəkilmiş həqiqi cəsarət sahibləri, digər tərəfdə isə hay-küylə öz boşluğunu ört-basdır etməyə çalışan cəsarətsizlər... Burada öz ayaqları üzərində durmaq, öz sözünü demək riskdir — dərhal daş-qalaq olunarsan. Amma kölgələrə sığınanlar, kiməsə arxalananlar rahat nəfəs alar, çünki toplum belələrinə susmağı üstün tutar.

Ədalətin və tərəzinin tez-tez pozulduğu, dəyərlərin yer dəyişdirdiyi qəribə bir səhnədir burası...

​İnsanların bir-birinə baxışı da, verdiyi qiymət də təzadlıdır. Yaşlaşdıqca müdrikləşmək əvəzinə, sərhədləri aşanlara "pozitiv" adı qoyularkən, həyatı, gəncliyini kəşf etmək istəyən cavanlara hədd qoyular, "ayıbdır" deyilib yolları kəsilər!

Hətta inamın, mənəviyyatın belə formalaşdırdığı anlayışlar alt-üst olub. Səmimiyyətlə Allaha yönələn tənqid hədəfinə çevrilərkən, keçici həvəslərin arxasınca qaçanlar qəhrəman kimi qələmə verilər. Maskaların çox, həqiqətlərin az olduğu bir məkandır bu şəhər...

​Ən acınacaqlısı isə maddiyyatın insani münasibətləri zəncirləməsidir. Cibindəki iki manatla bir manatı olana yuxarıdan aşağı baxanlar, üç manatı olanın qarşısında əyilməkdən çəkinməzlər. Kasıbın varlı kimi görünmək kompleksi, varlının isə özünü hər şeyin sahibi sanmaq təkəbbürü bu şəhərin küçələrində hər gün qarşımıza çıxan acı bir mənzərədir. İnsan dəyəri cibdəki qəpiklərlə ölçülən zaman, mənəviyyat kölgədə qalmağa məhkumdur.

​Lakin bütün bu eybəcərliklərə, ikiüzlülüyə və haqsızlıqlara baxmayaraq, o, qədimdir. Qədimliyin gətirdiyi yorğunluqla yanaşı, hələ də təmiz qalmaq, cavan kimi döyünmək istəyən bir ürəyi var bu şəhərin. O, öz içindəki bütün ziddiyyətləri ilə birlikdə doğmadır. Çünki bizi biz edən, bəzən incitsə də, bəzən küsdürsə də, elə bu şəhərin dözümlü və canlı ruhudur...

Tural İbrahimov
Publisist
Onews.az