"Dinc və sakitcə proseslər davam edir - qalanı isə, indi müxalifətin təşkil etməyə çalışdığı, stəkanda fırtınadır".

Onews.az xəbər verir ki, bu fikirləri Gürcüstanın Baş naziri İrakli Kobaxidze jurnalistlərə açıqlamasında deyib.

Onun sözlərinə görə, yanvarın əvvəlində prezident seçkiləri baş tutacaq:

"Hər şey sakit, rahatdır, seçkilərin nəticələri ümumiləşdiriləcək, on gündən sonra isə parlamentin iclası keçiriləcək. Bundan sonra parlamentdə yeni dövr başlayacaq. Çox qısa müddət sonra, yəqin ki, yanvarın əvvəlində prezident seçkiləri baş tutacaq, daha sonra prezidentin inauqurasiyası olacaq. Ölkə adi qaydada həyatına davam edir. Bir çox layihələr həyata keçirilir, dördillik proqramımızın icrasına başlayırıq. Dörd ilin sonunda Gürcüstan cəmiyyətinə uyğun hesabat təqdim etmək məsuliyyətini daşıyırıq. Hər şey adi qaydada, sakit, rahat davam edir, qalanı isə müxalifətin təşkil etməyə çalışdığı stəkanda fırtınadır".

Qonşu ölkənin baş naziri Baş nazir həmçinin müxalifət partiyalarının mandatlarının dayandırılması məsələsinə də münasibət bildirib:

“Bildiyiniz kimi, Gürcüstanın konstitusiyası və qanunvericiliyində təxribat əleyhinə mexanizmlər var. Biz bu mexanizmdən 4 il əvvəl istifadə etmişdik, indi də istifadə edəcəyik. Gürcüstan qanunvericiliyinə zidd olan bu cür addımlar sırf piar məqsədi daşıyır, daha təsirli ola bilməz. Hər kəs bilir ki, parlamentin ilk iclasına qədər siyahıları bağlamaq mümkün deyil, ona görə də ilk iclas baş tutanda bütün deputatların səlahiyyətləri məlum olacaq. Bundan sonra kimsə siyahıların bağlanması, mandata xitam verilməsi üçün Gürcüstan parlamentinə və ya MSK-ya müraciət etmək istəsə, bəli, bunu edə bilər, bu, yalnız birinci iclasdan sonra olur”, - deyə İrakli Kobaxidze bildirib.

Elgiz Məmməd