Azərbaycan diplomatiyası son 21 ildə cənab prezidentin rəhbərliyi altında çox böyük uğurlara imza atıb.

Uğurun zirvə nöqtəsi isə Azərbaycanın ərazi bütövlüyünün bərpasıdır. Rəsmi Bakı son dörd il ərzində hücum diplomatiyasında çox böyük nailiyyətlər qazanıb. Prezident İlham Əliyev hazırda çoxqütblü dünyanın konfiqurasiyasına uyğun çoxgedişli oyun qurucusu kimi dünya ictimaiyyətinin diqqət mərkəzindədir. İndi dünyanın bəzi aparıcı dövlət başçıları ölkəmizin başçısı ilə söhbət etmək üçün növbə gözlədiklərini gizlətmirlər. Təbii ki, Qərbdəki və digər qütblərdəki müəyyən dairələr Azərbaycanın bu uğurlarını həzm edə bilmirlər.

Ona görə də ölkəmizə qarşı çirkin kampaniyalara başlayıblar. ABŞ-nin Bayden administrasiyası, Fransa və Avropa İttifaqının Sorosçu əlaltıları ölkəmizə və onun başçısına qarşı hücumları, təzgiqləri artırıblar.

Azərbaycan indi güclü dövlətdir və Bakı Cənubi Qafqazı da əbədi sülh yolu ilə aparmaq üçün əlindən gələni edir. İmperialist qüvvələr isə buna qarşıdır. Çünki Əliyevin kapitanlığındakı ölkəmiz həmin qütblərin və dairələrin planlarını pozur. Bakı Ankara ilə birgə dünya nizamına yeni çətirlə - Türk Birliyi ilə gəlir. Qərb isə bunu qəfiyyətlə istəmədiyini açıq formada ifadə edir. Qərb koalisiyası Güney Qafqazda möhkəmlənmək üçün onun açarına - Azərbaycana sahib olmaq istəyir.

Bakı isə ənənəvi balanslı siyasət kursuna sadiqdir. Qərb Gürcüstandakı məğlubiyyətini həzm edə bilmir və bu yenilgini kilid nöqtəsinə - Bakıya sahiblənməklə əldə etməyi düşünür. Ancaq bir Avropada və Amerikada bir nüansı unudurlar ki, Azərbaycan 100 il öncəki Odlar Yurdu deyil. Biz indi öz göbəyimizi özümüz kəsirik. Bizimlə hədə dilində danışmaq qeyri-mümkündür.

Bu gedişlə 2025-ci ildə Qərb Bakıya qarşı yeni həmlələr edəcək. Onun nüfuzunu sarsıtmağa çalışacaq. Hətta teraktlar da mümkündür. Ona görə də sərhədlərin bu müddətdə qapalı qalmasının sırf milli təhlükəsizliyimizlə bağlı olmasını Azərbaycan ictimaiyyəti çox yaxşı başa düşür. Xalq-iqtidar-ordu birliyi indi daha da güclüdür. Bu güc mövcud olduqca iradəmizi sarsıtmaq mümkün olmayacaq.

Sona Əliyeva
V çağırış Milli Məclisin deputatı
Onews.az