Hazırda Ermənistanda vəziyyət sözün əsl mənasında ruscadır. Rus hərbçilərinin Ermənistan-İran sərhədindən çıxarılması İran tərəfini də təşvişə salıb.

Molla rejiminin rəsmiləri durmadan İrəvana baş çəkirlər. Tehran hadisələrin bundan sonrakı inkişafı üçün Tehranın ağzını aramaq istəyir.

İran tərəfi Ermənistan sərhədinə Qərb koalisiya güclərinin yerləşdirilib-yerləşdirilməyəcəyi birinci ağızdan öyrənməyə çalışır.

Görünür, İranın baş kəşfiyyatçısı Əhmədianın İrəvana səfərindən milliyətçi molla rejimi o qədər razı qalmayıb.

Əgər Nikol Paşinyan hakimiyyəti rusların çıxdığı keçid nöqtələrinə özününküləri yox, fransızların təhriki ilə Qərb silahlılarını yerləşdirsə, o zaman Tehranı növbəti dizəsməsi tutacaq.

Tehran yenidən Bakının ayaqlarına düşəcək və bu dəfə İrandakı rejim Zəngəzur dəhlizinin açılması üçün yandırdığı qırmızı işığı əvvəl sarıya, sonra da yaşıla dəyişəcək.

İran hələ də anlaya bilmir ki, dünya siyasətinə küçə diplomatiyasını gətirən Nikol Vovayeviçin ipinin üstünə odun yığmaq olmaz.

Ermənistan artıq son dörd ildə ağuşuna sığındığı İrana bir neçə dəfə badalaq gəlib. İrəvanın Tehranın kürəyini yerə vurması Qərb yaraqlılarının iki ölkə sərhədində görünməsindən sonra baş verəcək.

İrandakı sağlam təfəkkürlü beyin mərkəzləri indi anlamağa başlayıblar ki, Bakıdan təhlükə yox imiş, əsl hürkütücü istiqamət məhz İrəvandır.

11 yanvar 2025, Bakı
Tural Turan

Onews.az