Azərbaycan hələ üç il öncə Rusiya ilə strateji tərəfdaşlıq və müttəfiqlik sazişi imzalasa da, şimal qonşumuzda müəyyən dairələr hələ də bizə qarşı ikili standartlarla çıxış edirlər.

Hətta bəziləri bir qədər də irəli gedərək bu münasibətləri düşmənçilik səviyyəsinə qaldırmağa çalışırlar. Bunu bir sıra hallarda Rusiyanın yüksək çinli məmurlarının ölkəmizə qarşı işlətdiyi ifadə və hərəkətlərdən də aydın müşahidə etmək mümkündür.

Görünən odur ki, Rusiyada bəzi ermənipərəst və imlerialist dairələr Azərbaycanın heç kəsdən asılı olmadan, müstəqil siyasət yürütməsini istəmirlər.

Eyni zamanda, dövlətlərarası rəsmi sənədlərdən irəli gələn əlaqələrə kölgə salaraq şəxsi ambisiyalarından çıxış edirlər. Bu da iki ölkə arasındakı münasibətlərə kölgə salır.

Düşünürəm ki, Rusiya bu gedişlə ən yaxın və səmimi müttəfiqlərini də itirəcək və regionda təklənəcək. Azərbaycan kimi səmimi dostu, etibarlı tərəfdaşı itirmək Rusiyaya baha başa gələ bilər. Görünür, Kremldəki ikitirəlik, Rusiya daxilindəki siyasi parçalanmalar bu barədə düşünməyə imkan vermir.

Bakı ikitərəfli və beynəlxalq əlaqələr konteksində hər zaman Moskvaya qarşı ədalətli olub. Qonşumuzun mənafelərinə xələl gətirəcək addımlara yol verməmişik və qonşuluq, dostluq prinsiplərini əsas götürmüşük. Rusiya səmasında Azərbaycan təyyarəsinin vurulmasına görə, cəmiyyətimiz haqlı olaraq günahkarların tapılmasını və cəzalandırılmasını tələb etdi. Amma Kreml indiyə qədər bu istiqamətdə hər hansı addım atmayıb.

Əksinə, məsuliyyəti öz üzərindən atmağa çalışır. Düşünürəm ən qısa zamanda, Kreml səhvini anlayacaq. Əks halda, Bakı Moskavadan haqlı olaraq uzaqlaşmaq yolunu tutacaq.

Sona Əliyeva
V çağırış Milli Məclisin deputatı

Onews.az